एच.एस.आर.पी. नंबर प्लेट बसविण्यासाठी पुन्हा मुदत वाढ अंतिम मुदत 30 जून 2026 पर्यंत..

1 जुलै 2026 पासून एच.एस.आर.पी. प्लेट नसलेल्या सर्व जुन्या-नव्या वाहनांवर मोटार वाहन कायद्यानुसार कारवाई करण्यात येणार..

पोलीस वार्ता, नाशिक : सर्व वाहनांना उच्च सुरक्षा नोंदणी क्रमांक पाटी म्हणजे HSRP बसविणे बंधनकारक करण्यात आले आहे. यासाठी 1 एप्रिल 2019 पूर्वी नोंदणी झालेल्या सर्व जुन्या वाहनांवर एच.एस.आर.पी. बसविणे गरजेचे असून यापूर्वी अनेक वेळा यासाठी मुदत वाढ देण्यात आली होती. परिवहन आयुक्त कार्यालयाने दि.21 मे रोजी प्रसिद्ध केलेल्या माहितीनुसार वाहनधारकांच्या सोयीसाठी पुन्हा एकदा मुदतवाढ देत एच.एस.आर.पी. नंबर प्लेट बसविण्याची अंतिम मुदत 30 जून 2026 पर्यंत निश्चित केली आहे.

एच.एस.आर.पी. न बसविलेल्या वाहन धारकांना, वाहन कर्ज उतरविणे, चढविणे, वाहन हस्तांतरण, पुनर्नोंदणी, वाहनातील नोंद बदल करणे तसेच परवाना नूतनीकरण यांसारख्या अनेक सुविधा मिळणार नाही. त्यासाठी यापूर्वीच ही कामे थांबविण्यात आली आहेत. तसेच, 1 जुलै 2026 पासून एच.एस.आर.पी. प्लेट नसलेल्या सर्व जुन्या व नव्या वाहनांवर मोटार वाहन कायद्यानुसार कायदेशीर कारवाई करण्यात येणार आहे. मात्र 30 जून 2026 पर्यंत HSRP प्लेट बसविण्यासाठी अधिकृत संकेतस्थळावरून अपॉइंटमेंट घेतलेल्यांवर कारवाई केली जाणार नाही. असे प्रादेशिक परिवहन अधिकारी शिंदे यांनी जाहीर केले आहे.