सुरुवातीला अदखलपात्र गुन्ह्याची नोंद, आंदोलनानंतर राजगड पोलिसांनी गंभीर कलमांखाली गुन्हा दाखल केला आहे..
पोलीस वार्ता, पुणे : भोर तालुक्यातील कापूरहोळ येथे पत्रकारावर झालेल्या कथित हल्ल्याप्रकरणी सुरुवातीला पोलिसांनी अदखलपात्र गुन्हा दाखल केला होता. परंतु पत्रकार राम पाचकाळे यांच्या आंदोलनानंतर प्रशासनाने दाखल घेत जिल्हाधिकाऱ्यांच्या निर्देशानंतर राजगड पोलिसांनी FIR दाखल केली आहे. त्यामुळे या प्रकरणाला महत्त्वपूर्ण वळण मिळाले आहे.
मिळालेल्या माहितीनुसार, दि.28 एप्रिल 2026 रोजी सायं. सुमारे 4.45 वाजण्याच्या सुमारास कापूरहोळ येथील हायवे रोड परिसरात अतिक्रमण हटविण्याची कारवाई सुरू असताना पत्रकार राम पाचकाळे हे मोबाईलद्वारे चित्रीकरण करत होते. त्यावेळी हॉटेल आनंद व आनंद वाईन्सचे मालक आनंद काशिनाथ दळवी व त्यांचा मुलगा तसेच इतर संबंधित व्यक्तींनी त्यांना अडवून “येथे काय काम आहे, येथे येऊ नकोस” असे म्हणत शिवीगाळ, दमदाटी व मारहाण केल्याची घटना घडली होती तसेच पत्रकार पाचकाळे यांना जीवे मारण्याची धमकी देण्यात आल्याचीही माहिती तक्रारीत देण्यात आली होती.
या घटनेत सुरुवातीला राजगड पोलीस स्टेशनकडून अदखलपात्र गुन्ह्यांची नोंद करण्यात आली होती. मात्र, घटना गंभीर स्वरूपाची असून पत्रकाराच्या कर्तव्यात अडथळा निर्माण करून मारहाण व धमकी दिल्याचा आरोप असल्याने गंभीर गुन्हा दाखल करावा, अशी मागणी पत्रकार राम पाचकाळे यांनी पोलिसांना केली होती.
दरम्यान, न्याय मिळत नसल्याचा आरोप करत राम पाचकाळे यांनी दि.11मे 2026 रोजी पुणे येथील जिल्हाधिकारी कार्यालयासमोर आंदोलन सुरू केले. या आंदोलनाची दखल घेत जिल्हाधिकाऱ्यांनी संबंधित राजगड पोलीस प्रशासनाला योग्य ती कारवाई करण्याच्या सूचना दिल्या.
