अकुलखेडा येथे अनैतिक प्रेमसंबंधातून हत्या करून एकाची आत्महत्या!

गावठी पिस्तूलातून पहिले अनिताच्या डोक्यात गोळी झाडून तिची हत्या केली. त्यानंतर त्याने स्वतःवरही गोळी झाडून आत्महत्या केली..

पोलीस वार्ता, चोपडा : तालुक्यातील अकुलखेडा येथे अनैतिक प्रेमसंबंधातून एक धक्कादायक घटना घडली आहे. प्रियकराने गावठी पिस्तूलातून गोळी झाडून प्रियसीची हत्या केली आणि त्यानंतर स्वतःवरही गोळी झाडून स्वतः आत्महत्या केली आहे. आज दि.28 फेब्रुवारी 2026 रोजी सकाळी ही घटना समोर आली. शाळेतून घरी परतलेल्या मुलीला दोघेही रक्ताच्या थारोळ्यात पडलेले आढळले आणि पोलिसांना माहिती मिळाली.

मिळालेल्या माहितीनुसार, अकुलखेडा येथील जगदीश काशिनाथ पाटील यांच्या राहत्या घरात त्यांची पत्नी अनिता जगदीश पाटील आणि देवा सुरेश धनगर हे रक्तबंबाळ अवस्थेत आढळून आले. दि.28 फेब्रुवारी रोजी सकाळी 10:30 वाजेच्या सुमारास पाटील दाम्पत्याची मुलगी शाळेतून घरी आल्यानंतर तिने घरात प्रवेश केला असता दोघांचेही मृतदेह पाहून आरडाओरड केला तिच्या आवाजाने शेजारी जमा झाले आणि घटनेची माहिती पोलिसांना देण्यात आली.

अनिता पाटील आणि देवा धनगर यांचे सोशल मीडियाच्या माध्यमातून प्रेमसंबंध जुळले होते. काही दिवसांपासून अनिता वेळ देत नसल्याच्या कारणावरून देवा धनगर संतप्त झाला होता. रागाच्या भरात त्याने अकुलखेडा येथील तिच्या घरी जाऊन गावठी पिस्तूलातून पहिले अनिताच्या डोक्यात गोळी झाडून तिची हत्या केली. त्यानंतर त्याने स्वतःवरही गोळी झाडून त्याचे जीवन संपविल्याचे पोलिसांच्या प्राथमिक तपासात समोर आले आहे.

घटनास्थळी मृत देवा धनगर याची दुचाकी आढळून आली असून ती पोलिसांनी ताब्यात घेतली आहे. घटनेची माहिती मिळताच उपविभागीय पोलीस अधिकारी अण्णासाहेब घोलप तसेच चोपडा शहर पोलीस ठाण्याचे पोनि. मधुकर सावळे यांनी तात्काळ घटनास्थळी धाव घेतली. दोघांचे मृतदेह उपजिल्हा रुग्णालयात हलविण्यात आले असून शवविच्छेदनानंतर मृतदेह नातेवाईकांच्या ताब्यात देण्यात येणार आहेत. या प्रकरणाचा पुढील तपास पोलीस करत असून घटनेचे नेमकं कारण शोधत आहे. या घटनेमुळे अकुलखेडा परिसरात हळहळ व्यक्त केली जात आहे.