हॉटेल राधाकृष्णपासून ढोल-ताशांच्या गजरात भव्य मिरवणूक; ‘महाकाल’च्या जयघोषाने परिसर दुमदुमला
भुसावळ : उज्जैन येथील सोमेश्वर महाराजांचे भुसावळ शहरातील रामायण नगर परिसरात आगमन झाले. महाराजांच्या आगमनानिमित्त हॉटेल राधाकृष्ण येथून भव्य मिरवणूक काढण्यात आली. ढोल-ताशांचा गजर, डीजेचा निनाद आणि ‘महाकाल’च्या जयघोषामुळे संपूर्ण परिसर भक्तिमय वातावरणाने भारावून गेला होता. भाविकांनी मोठ्या उत्साहात महाराजांचे स्वागत केले.
यावेळी सोमेश्वर महाराजांनी सनातन धर्माबाबत विचार व्यक्त केले. “सनातन धर्माची पताका संपूर्ण भारत देशात फडकविण्यासाठी सर्व साधू-संतांचे प्रयत्न सुरू आहेत. हिंदू धर्म हा सनातन धर्म असून विविधतेच्या आशीर्वादाने मनुष्य सुखी होऊ शकतो,” असे त्यांनी सांगितले.
महाराजांच्या आगमनाबद्दल शिष्य प्रदीप देशमुख यांनी आनंद व्यक्त केला. “भुसावळ शहरात सोमेश्वर महाराजांचे आगमन होणे हे आपल्यासाठी भाग्यकारक आहे,” अशी भावना त्यांनी व्यक्त केली.
दरम्यान, प्रदीप देशमुख यांच्या निवासस्थानी गणेशोत्सव सुरू असून त्यानिमित्त सत्यनारायण पूजेचेही आयोजन करण्यात आले होते. यावेळी सोमेश्वर महाराजांची यथासांग पूजा करण्यात आली. भाविकांनी महाराजांचे आशीर्वाद घेतले. या धार्मिक कार्यक्रमामुळे रामायण नगर परिसरात दिवसभर भक्तिमय वातावरण राहिले.
