सीसीटीव्हीने शोध घेऊन आरोपींना अटक करून चोरीचे 50 हजार रोकड व तीन तोळे सोन्याचे दागिने जप्त..
पोलीस वार्ता, रावेर | शहरातील जुनी नगरपालिका रोड परिसरातील एका बंद घराचे कुलूप तोडून रोकड व सोन्याचे दागिने लंपास करणाऱ्या दोन संशयित चोरांना रावेर पोलिसांच्या गुन्हे शोध पथकाने अवघ्या 24 तासांत पकडून जेरबंद केले आहे. ज्यात आरोपी रितेश रविंद्र नेवे, वय-31 वर्षे, रा. इंद्रप्रस्थ कॉलनी, कलेक्टर बंगल्यामागे, जळगाव आणि आरोपी गजेंद्र सोपान चौधरी, वय-38 वर्षे, रा. मामुराबाद, इंदिरानगर, ईदगाह रोड, जळगाव, सध्या रा. सिल्वासा, जि. नगरहवेली यांना अटक करण्यात आली आहे.
रावेर पोलीस ठाण्यात दि.20 सप्टेंबर रोजी या प्रकरणी गुन्हा दाखल करण्यात आला होता. फिर्यादी महिला अंगणवाडी सेविका असून त्या दि.11 सप्टेंबर रोजी सकाळी सातच्या सुमारास घराला कुलूप लावून कामानिमित्त अहिरवाडी येथे गेल्या होत्या. त्या दिवशी दुपारी दोनच्या सुमारास त्या घरी परतल्या असता घरातील सामान अस्ताव्यस्त पडलेले दिसले. घराच्या मागील दरवाजाचा कडी-कोयंडा तुटलेल्या अवस्थेत त्यांना आढळून आला. घरातील मौल्यवान वस्तू तपासल्या असता 50 हजार रुपये रोख रक्कम व दोन तोळ्यांचे सोन्याचे लॉकेट आणि प्रत्येकी पाच ग्रॅम वजनाच्या दोन सोन्याच्या अंगठ्या असा ऐवज चोरीला गेल्याचे त्यांच्या निदर्शनास आले. त्यांनी याप्रकरणी रावेर पोलीस ठाण्यात तक्रार देऊन चोरीचा गुन्हा दाखल केला.
सीसीटीव्हीच्या आधारे आरोपींची ओळख
गुन्हा दाखल होताच पोलिस निरीक्षक संदीप पाटील यांनी गुन्हे शोध पथकाला तपासाच्या सूचना दिल्या. पथकाने रावेर शहरातील विविध ठिकाणचे सीसीटीव्ही फुटेज तपासले. दिवसा चोरी झाल्याने तपासात काही अडथळे येत असतानाच एका सीसीटीव्ही कॅमेऱ्यात आरोपींचे चेहरे स्पष्टपणे कैद झाल्याचे पोलिसांच्या निदर्शनास आले. या फुटेजच्या आधारे तांत्रिक विश्लेषण तसेच गोपनीय माहितीच्या माध्यमातून आरोपींची ओळख पटविण्यात पोलिसांना यश आले. त्यानंतर पोलिसांनी दोन्ही आरोपींना दि.21 सप्टेंबर रोजी अटक केली.
आरोपी निघाला नातेवाईक
पोलिसांनी केलेल्या चौकशीत आरोपी रितेश नेवे हा फिर्यादी महिलेच्या बहिणीचा मुलगा असल्याचे निष्पन्न झाले. फिर्यादी व त्यांच्या बहिणीचा मागील काही वर्षांपासून संपर्क नसल्याचे पोलिसांनी सांगितले. फिर्यादी महिला घरात एकट्याच राहत असल्याची माहिती असल्याचा फायदा घेत आरोपी रितेश नेवे याने मित्राच्या मदतीने घरफोडी केल्याचे तपासात समोर आले आहे.
