न्हावी, ता. यावल : गणपती विसर्जन मिरवणूक पाहण्यासाठी महादेववाडा परिसरात उभ्या असलेल्या १६ वर्षीय मुलीला युवकाने लाथाबुक्क्यांनी मारहाण केल्याची घटना रविवारी रात्री घडल्याची माहिती समोर आली आहे. या घटनेनंतर परिसरात काही काळ तणावाचे वातावरण निर्माण झाले होते. मात्र, पोलिसांच्या हस्तक्षेपानंतर परिस्थिती नियंत्रणात आली असून गणपती विसर्जन मिरवणूक शांततेत सुरू आहे.
मिळालेल्या माहितीनुसार, संजय चौधरी यांची १६ वर्षीय मुलगी गणपती विसर्जन मिरवणूक पाहण्यासाठी महादेववाडा परिसरात उभी होती. त्यावेळी चेतन ललित झोपे (वय ३०) याने तिच्याशी वाद घालत लाथाबुक्क्यांनी मारहाण केल्याचा आरोप आहे. या मारहाणीत मुलगी बेशुद्ध झाल्याने तिला तातडीने भुसावळ येथील लोकेश नेहते यांच्या दवाखान्यात दाखल करण्यात आले. तिच्यावर उपचार सुरू असल्याचे सांगण्यात आले.
दरम्यान, घटनेनंतर चेतन झोपे यालाही जमावाकडून मार लागल्याची माहिती आहे. परिस्थिती अधिक चिघळू नये यासाठी स्थानिक पोलिसांनी तातडीने हस्तक्षेप करून जमावाला शांत केले. त्यानंतर मिरवणूक पुन्हा शांततेत मार्गस्थ करण्यात आली. संबंधितांची वैद्यकीय तपासणी करण्यासाठी त्यांना रुग्णालयात नेण्यात आल्याचे सांगण्यात आले.
घटनेनंतर काही काळ न्हावी परिसरात तणावाचे वातावरण होते. मात्र, सध्या परिस्थिती नियंत्रणात असून गणपती विसर्जन मिरवणूक शांततेत सुरू आहे.
वृत्त लिहीपर्यंत या घटनेप्रकरणी पोलिस ठाण्यात गुन्हा दाखल झालेला नसल्याची माहिती आहे. मारहाणीचे नेमके कारण, घटनेची वस्तुस्थिती आणि पुढील पोलिस कारवाई याबाबत अधिकृत नोंदीनंतरच स्पष्टता येणार आहे.
