गेल्या आठवड्यात महायुती आणि महाविकास आघाडीने आपापले जाहीरनामे प्रसिद्ध केले. त्यानंतर आज मुंबई काँग्रेसच्यावतीने देखील जाहीरनामा प्रकाशित..
पोलीस वार्ता, मुंबई | महाराष्ट्र मुंबई काँग्रेसने आगामी विधानसभा निवडणुक 2024 साठी आपला जाहीरनामा “मुंबईनामा” प्रसिद्ध केला आहे. या जाहीरनाम्यात मुंबईसाठी विविध महत्त्वाच्या आश्वासनांचा समावेश आहे. काँग्रेसने धारावी पुनर्वसन प्रकल्पाच्या संदर्भात अदानी प्रकल्प रद्द करून स्थानिक रहिवाशांच्या इच्छेनुसार नवीन प्रकल्प राबवण्याचे आश्वासन दिले आहे. यामध्ये 500 चौरस फुटांचा भुखंड आणि आर्थिक वापरासाठी जागा दिली जाणार आहे. तसेच, धारावीत निर्यात प्रधान केंद्र निर्माण करण्याची योजना आहे.
दुसऱ्या महत्त्वाच्या आश्वासनांमध्ये, मुंबईतील गृहनिर्माण सोसायट्यांसाठी 50 हजारांच्या वर प्रलंबित कब्जा प्रमाणपत्रे 6 महिन्यात देण्याचे, तसेच विधानसभेच्या पहिल्या अधिवेशनात गृहनिर्माण सोसायट्यांवरील 18% जीएसटी कमी करून 5% करण्याचा प्रस्ताव ठेवण्याचे म्हटले आहे. महिलांसाठी वन स्टॉप क्रायसीस सेंटर आणि सुरक्षित व परवडणारी वसतीगृहे उभारण्याचे आश्वासनही जाहीरनाम्यात दिले आहे.
मुंबईतील मच्छिमारांसाठी 5 लाख रुपये कर्ज माफी, ससून व माझगाव बंदरांसह मत्स उत्पादन विपणन परिषदांची स्थापना आणि कोळीवाड्यात विकास कामे हाती घेण्याची घोषणा करण्यात आली आहे.
