मुंबई : भुसावळच्या राजकारणात गुरुवारी महत्त्वाची राजकीय घडामोड घडली. मुंबईतील नंदवन येथे महाराष्ट्राचे उपमुख्यमंत्री तथा शिवसेना पक्षप्रमुख एकनाथ शिंदे यांच्या नेतृत्वावर व विचारांवर विश्वास व्यक्त करीत प्रहारचे उत्तर महाराष्ट्र अध्यक्ष अनिल चौधरी, भुसावळच्या लोकनियुक्त नगराध्यक्षा गायत्री भंगाळे आणि निखिल चौधरी यांनी शिवसेनेत जाहीर प्रवेश केला.
भुसावळ व जळगाव जिल्ह्याच्या विकासासाठी राजकीय ताकद उभी करणे, शिवसेनेची संघटनात्मक ताकद वाढविणे तसेच जनतेच्या प्रश्नांसाठी अधिक प्रभावीपणे काम करणे, हा या प्रवेशामागील प्रमुख उद्देश असल्याचे सांगण्यात आले.
या प्रवेशामुळे अनिल चौधरी आणि नगराध्यक्षा गायत्री भंगाळे यांच्या नेतृत्वाला शिवसेनेची नवी राजकीय ताकद मिळण्याची शक्यता व्यक्त होत आहे. जळगाव जिल्ह्याचे पालकमंत्री तथा शिवसेना नेते गुलाबराव पाटील, पाचोरा आमदार किशोर पाटील, आमदार बच्चू कडू, चोपडा आमदार चंद्रकांत सोनवणे, मुक्ताईनगर आमदार चंद्रकांत पाटील, पारोळा आमदार अमोल पाटील, उपनेत्या सरिता माळी-कोल्हे तसेच जिल्हाप्रमुख समाधान महाजन यांच्या मार्गदर्शन व सहकार्याने हा राजकीय प्रवास पुढे नेला जाणार असल्याचे नमूद करण्यात आले.
दरम्यान, या प्रवेशामुळे भुसावळच्या राजकारणातील विद्यमान समीकरणांवर परिणाम होण्याची शक्यता आहे. आगामी काळात या नव्या राजकीय आघाडीमुळे कोणती समीकरणे आकाराला येतात, याकडे जळगाव जिल्ह्याचे राजकीय वर्तुळाचे लक्ष लागले आहे.
