सोन्या-चांदीचे दागिने व रोख रक्कम जप्त; जळगावात खळबळ
जळगाव : सहकारी संस्था विभागातील उपनिबंधक जगीदीश बाबुराव वारी यांना लाचलुचपत प्रतिबंधक विभागाने भ्रष्टाचार प्रकरणात अटक केली आहे. त्यांच्या ताब्यातून तब्बल १ कोटी ७ लाख ४४ हजार ७५० रुपयांचा मुद्देमाल जप्त करण्यात आल्याने जिल्ह्यात मोठी खळबळ उडाली आहे.
लाचलुचपत प्रतिबंधक विभागाने दिलेल्या माहितीनुसार, जळगाव तालुक्यातील शांती नगर, यावल रोड परिसरातील राहत्या घरावर छापा टाकण्यात आला. या कारवाईत ६० लाख ३३० रुपये किमतीचे सुमारे ९०० ग्रॅम वजनाचे सोन्याचे हार, बांगड्या व सोन्याची बिस्किटे, तसेच ८ लाख ५६ हजार ५०० रुपयांची रोख रक्कम आणि ३८ हजार २५० रुपये किमतीचे ९०० ग्रॅम वजनाचे चांदीचे दागिने असा ऐवज जप्त करण्यात आला.
या प्रकरणी जळगाव येथील लाचलुचपत प्रतिबंधक विभागात भ्रष्टाचार प्रतिबंधक अधिनियमांतर्गत गुन्हा दाखल करण्यात आला आहे. आरोपी जगीदीश वारी हे सहकारी संस्था विभागात उपनिबंधक पदावर कार्यरत होते.
दरम्यान, आरोपीला अटक करून न्यायालयात हजर करण्यात आले असून पुढील तपास लाचलुचपत प्रतिबंधक विभागाकडून सुरू आहे.
