ज्येष्ठांच्या अडचणी ऐकून घेणारी, त्यांना मार्गदर्शन व प्रत्यक्ष मदत देणारी ही सेवा आज अनेकांसाठी आधारवड ठरत आहे..
पोलीस वार्ता, नाशिक : ज्येष्ठ नागरिकांसाठी राष्ट्रीय टोल-फ्री हेल्पलाईन नंबर 14567 ही सेवा भारतातील सर्व राज्ये व केंद्रशासित प्रदेशांमध्ये सुरू करण्यात आली आहे. राज्यात ही सेवा जनसेवा फाउंडेशन, पुणे यांच्या माध्यमातून प्रभावीपणे राबवली जात आहे. सामाजिक न्याय आणि सक्षमीकरण मंत्रालय, भारत सरकार, राष्ट्रीय सामाजिक संरक्षण संस्था आणि राज्य सरकारांच्या वतीने गरजू ज्येष्ठ नागरिकांसाठी सेवा उपलब्ध केली आहे. या क्रमांकावर ज्येष्ठ नागरिकांसाठी त्यांचे नातेवाईक देखील संपर्क साधून शकता. अशी माहिती संस्थेचे संस्थापक अध्यक्ष डॉ.विनोद शहा यांनी दिली आहे.
“घरात असूनही एकटे आहोत…”, “मुलगा परदेशात आहे…”, “नातेवाईकांनी घराबाहेर काढले…” अशा वेदनादायक अनुभवांची कहाणी महाराष्ट्रासह देशभरातील अनेक ज्येष्ठ नागरिक ‘एल्डर लाईन 14567’ या हेल्पलाईनवर मोकळेपणाने मांडत आहेत. ज्येष्ठांच्या अडचणी ऐकून घेणारी, त्यांना मार्गदर्शन व प्रत्यक्ष मदत देणारी ही सेवा आज अनेकांसाठी आधारवड ठरत आहे. वृद्धांच्या गरजा समजून घेतल्या जातात आणि त्यांना सन्मानाने जगता यावे यासाठी आवश्यक ती मदत दिली जाते.
