साकरीत तरुणावर हल्ला; 8 जणांविरुद्ध तालुका पोलीस ठाण्यात गुन्हा दाखल!

लाकडी काठ्या व फावड्याच्या दांड्याने जबर मारहाण करत लाथाबुक्क्यांनी डोक्यावर, पाठीवर, हातापायांवर व खांद्यावर वार करून तरुणाला केले जखमी..

पोलीस वार्ता, भुसावळ : तालुक्यातील साकरी गावात एका तरुणावर गावातील आठ जणांनी संगनमत करून लाकडी काठ्या व फावड्याच्या दांड्याने हल्ला करून त्याला जबर मारहाण केल्याची गंभीर घटना सोमवार, दि.23 मार्च रोजी समोर आली आहे. या प्रकरणी भुसावळ तालुका पोलीस ठाण्यात आरोपींविरुद्ध गुन्हा दाखल करण्यात आला आहे.

पोलीसांकडून मिळालेल्या माहितीनुसार, तक्रारदार फिर्यादी सुनील सुरेश तायडे (वय-48) रा. तपत, कठोरा यांच्या फिर्यादीवरून प्रवीण बाविस्कर, दिनेश बाविस्कर, मोहन बाविस्कर, विकास काकडे, सागर सोनवणे, संजु तोंडे, माधुरी बाविस्कर व सुरेखा बाविस्कर सर्व राहणार साकरी, भुसावळ यांच्याविरुद्ध मारहाणीचा गुन्हा दाखल केला आहे.

सोमवार, दि.23 मार्च 2026 रोजी सकाळी 9:30 ते 10 वाजेदरम्यान साकरी येथील किन्ही रोडवर, खोकली माता मंदिरासमोर ही घटना घडली. फिर्यादीचा मुलगा हेमराज तायडे हा गावात कार घेऊन आल्याच्या कारणावरून आरोपींनी त्याच्यावर हल्ला केल्याचे फिर्यादीत नमूद केले आहे. आरोपींनी हातातील लाकडी काठ्या व फावड्याच्या दांड्याने जबर मारहाण करत लाथाबुक्क्यांनी हेमराजच्या डोक्यावर, पाठीवर, हातापायांवर व खांद्यावर वार करून त्याला जखमी केले. तसेच शिवीगाळ करत “विहिरीत फेकून देऊन जीवे ठार मारू” अशी धमकी दिल्याचेही तक्रारीत म्हटले आहे. या प्रकरणाचा पुढील तपास भुसावळ तालुका पोलीस ठाण्याचे पोनि. महेश गायकवाड हे करीत आहेत.