नारोद परिसरातील गुळी नदीवरील पुलावरून त्याला ढकलले. जखमी अवस्थेत असताना त्याच्या डोक्यात दगड घालून त्याची हत्या झाली..
पोलीस वार्ता, चोपडा : जळगाव जिल्ह्यात चोपडा तालुक्यातील नारोद येथे मोठ्या भावानेच लहान भावाची दगडाने ठेचून हत्या केल्याची धक्कादायक घटना घडली आहे. दि.21 मार्च रोजी दुपारी 1:30 वाजेच्या सुमारास ही घटना समोर आली असून आरोपी किरण पानाचंद पाटील (वय-27) याने त्याचा लहान भाऊ रोहन पानाचंद पाटील याची हत्या केल्याची कबुली पोलीसांना दिली आहे. पोलीसांनी त्याला ताब्यात घेतले असून या घटनेमुळे परिसरात खळबळ उडाली आहे.
मिळालेल्या माहितीनुसार, रोहन पाटील याचा मृतदेह नारोद येथील गुळ नदी पात्रात संशयास्पद स्थितीत आढळून आला होता. त्याच्या डोक्याला, गळ्याला तसेच पायाला गंभीर दुखापत झालेली होती. गावकऱ्यांनी ही माहिती पोलीस पाटील, विजय पाटील यांना दिल्यानंतर अडावद पोलीसांना यासंदर्भात कळविण्यात आले.
घटनेची माहिती मिळताच अडावद पोलीस ठाण्याचे सहाय्यक पोलीस निरीक्षक प्रमोद वाघ, चोपडा विभागाचे डीवायएसपी आण्णासाहेब घोलप तसेच स्थानिक गुन्हे शाखेचे पोलीस उपनिरीक्षक जितेंद्र वल्टे यांनी घटनास्थळी भेट देऊन तपास सुरू केला. काही तासांतच पोलीसांनी तपासाची दिशा निश्चित करत आरोपीला ताब्यात घेतले.
