कुरनूलमध्ये बस आणि दुचाकीच्या धडकेत आग लागून बसच्या 20 प्रवाशांचा होरपळून मृत्यु, अनेक प्रवासी जखमी!

शुक्रवारी पहाटे 3 वाजेच्या सुमारास कावेरी ट्रॅव्हल्सच्या धावत्या बसची रस्त्यावर समोरून येणाऱ्या दुचाकीसोबत धडक..

पोलीस वार्ता, मुंबई : आंध्र प्रदेशातील कुरनूल जिल्ह्यात शुक्रवारी 24 ऑक्टोबर रोजी एक धक्कादायक अपघात घडला आहे. हैदराबादहून बेंगळुरूला जाणारी कावेरी ट्रॅव्हल्सची एक लक्झरी व्होल्वो बस एका दुचाकीसोबत धडकली, ज्यामुळे अपघातात भीषण आग लागली. यात बसमधील 20 प्रवासी जागीच जळून मृत्युमुखी पडले, तर अनेक जण गंभीर भाजले गेले आहे. बसमधून आगीमुळे आरडाओरडा करणाऱ्या प्रवाश्यांचा आवाज ऐकून रस्त्याने जाणाऱ्यांनी पोलिसांना याची माहिती दिली. स्थानिक पोलीस घटनास्थळी पोहोचल्यानंतर युद्धपातळीवर प्रवाश्यांचे बचावकार्य सुरू केले.

सविस्तर वृत्त असे की, शुक्रवारी पहाटे 3 वाजेच्या सुमारास कावेरी ट्रॅव्हल्सच्या धावत्या बसची रस्त्यावर समोरून येणाऱ्या दुचाकीसोबत धडक झाली. दुचाकी बसखाली अडकली आणि इग्निशनमधून निघणाऱ्या ठिणग्यांमुळे काही मिनिटांतच संपूर्ण बस आगीच्या भक्ष्यस्थानी पडली. ही घटना बेंगळुरू-हैदराबाद राष्ट्रीय महामार्ग (एनएच-4) येथील सादसा चिन्थे पार्कजवळ घडली. अपघाताची माहिती मिळताच स्थानिक प्रशासन आणि अग्निशमन दलाचे पथक घटनास्थळी पोहोचले आणि त्यांनी बचावकार्य सुरू केले. आगीत बस पूर्णपणे जळून खाक झाली आहे.

कुरनूलचे पोलीस अधीक्षक विक्रांत पाटील यांनी स्थानिक माध्यमांना सांगितले की, “ही एक वातानुकूलित बस होती आणि प्रवाशांना पळून जाण्यासाठी खिडक्या तोडाव्या लागल्या. काचा फोडण्यात यशस्वी झालेल्यांनी आपले प्राण वाचवले.” पोलिसांच्या मते, बसमधील 40 प्रवाशांपैकी 20 जणांचा या घटनेत मृत्यू झाला आहे, तर 11 जणांवर सरकारी रुग्णालयात आणि 3 जणांवर खाजगी रुग्णालयात उपचार सुरू आहेत. बचाव आणि मदत पथकांनी आग आटोक्यात आणली आहे.

सध्या 18 प्रवासी जिवंत आहेत आणि त्यांची ओळख पटवण्यात आली आहे. पोलिसांनी सांगितले की अनेक मृतदेह पूर्णपणे जळाले आहेत, ज्यामुळे ओळख पटवणे कठीण झाले आहे. प्रत्यक्षदर्शींच्या मते, आग प्रथम बसच्या पुढच्या भागात लागली आणि नंतर वेगाने पसरली. काही प्रवाशांनी आपत्कालीन गेट तोडून बसमधून उडी मारण्यात यश मिळवले. त्यांना किरकोळ दुखापत झाली.