भोर तालुक्यातील किवत येथे सर्पदंशामुळे ४ वर्षांच्या चिमुकल्याचा दुर्दैवी मृत्यू झाल्याची घटना आज (दि.१०) सकाळी ८ वाजण्याच्या सुमारास घडली. विघ्नेश अजित चव्हाण (वय ४) असे मृत बालकाचे नाव असून तो अंगणवाडीमध्ये शिक्षण घेत होता.
मिळालेल्या माहितीनुसार, विघ्नेश सकाळी घराबाहेर लघुशंकेसाठी गेला असता त्याला अज्ञात प्राण्याने चावा घेतला. काही वेळानंतर पायाला चावा घेतल्याचे लक्षात येताच कुटुंबीयांनी तातडीने त्याला भोर येथील उपजिल्हा रुग्णालयात दाखल केले. मात्र, उपचार सुरू होण्यापूर्वीच डॉक्टरांनी त्याला मृत घोषित केले.
या घटनेनंतर उपजिल्हा रुग्णालयासमोर नातेवाईकांनी मोठा आक्रोश केला. यावेळी जिल्हा परिषद सदस्य प्रवीण जगदाळे, ग्रामपंचायत सदस्य अक्षय चव्हाण, रमेश पवार, सचिन पवार आणि योगेश कुमठे यांनी घटनास्थळी धाव घेऊन कुटुंबीयांचे सांत्वन केले.
विघ्नेशच्या अकाली मृत्यूमुळे कुटुंबावर दुःखाचा डोंगर कोसळला असून संपूर्ण किवत गावात शोककळा पसरली आहे. प्राथमिक माहितीनुसार हा मृत्यू विषारी सर्पदंशामुळे झाल्याचा अंदाज डॉक्टरांनी व्यक्त केला असून, अंतिम वैद्यकीय अहवालानंतरच नेमके कारण स्पष्ट होणार असल्याचे वैद्यकीय अधिकाऱ्यांनी सांगितले आहे.
