मुक्ताईनगर पोलिसांची मोठी कामगिरी; चोरीच्या 30 दुचाकींसह चोरटे ताब्यात!

चोरीच्या एकूण 30 दुचाकी, किंमत 25 लाख 80 हजार रुपयांचा मुद्देमाल जप्त; दोन आरोपींसह दोन अल्पवयीन अटकेत..

पोलीस वार्ता, मुक्ताईनगर | जळगाव जिल्ह्यासह राज्यातील विविध भागात वाहन चोरी करणाऱ्या टोळीचा पर्दाफाश मुक्ताईनगर पोलिसांनी केला आहे. एकूण चोरीच्या 30 दुचाकी चोरट्यांकडून जप्त करण्यात आल्या आहेत. या कारवाईत दोन आरोपी आणि दोन अल्पवयीन संशयितांना पोलिसांनी ताब्यात घेतले असून जप्त करण्यात आलेल्या सर्व दुचाकींची एकूण किंमत सुमारे 25 लाख 80 हजार रुपये इतकी आहे.

पोलीस अधीक्षक मा.श्रीकांत धिवरे यांनी जिल्ह्यात वाढत्या वाहनचोरींना आळा घालण्यासाठी विशेष मोहीम राबविण्याचे आदेश पथकाला दिले होते. त्यानुसार मुक्ताईनगर पोलीस ठाण्यात दाखल गुन्हा क्र. 273/2026 च्या तपासादरम्यान तांत्रिक विश्लेषण आणि गुप्त माहितीच्या आधारे संशयित आरोपी विशाल सुरेश सोनवणे (रा.पिंपरुड, ता.यावल) आणि कुंदन सुनिल महाले (रा.सालबर्डी, ता.मुक्ताईनगर) तसेच दोन अल्पवयीन संशयितांना कारवाईत ताब्यात घेण्यात आले आहे.

चौकशीत संशयितांनी 30 मोटारसायकली चोरी केल्याची कबुली दिली. चोरीनंतर दुचाकी रेल्वे स्थानके व बसस्थानकांवरील पे-अँड-पार्कमध्ये उभ्या करून तेथूनच ग्राहकांना विक्री करण्याची त्यांची कार्यपद्धती सुरू असल्याचे तपासात उघड झाले. या प्रकरणाचा तपास करताना गुजरातमधील उधना (सुरत) तसेच महाराष्ट्रातील कल्याण, नेरुळ, निफाड, वणी, इगतपुरी, गंगापूर, ओझर, सरकारवाडा, नेरळ, पारोळा, जिल्हा पेठ आणि एरंडोल पोलीस ठाण्यांमध्ये संबंधित दुचाकी चोरीचे गुन्हे दाखल असल्याचे निष्पन्न झाले आहे.

ही यशस्वी उल्लेखनीय कारवाई पोलीस अधीक्षक मा.श्रीकांत धिवरे, अपर पोलीस अधीक्षक संदीप गावित आणि उपविभागीय पोलीस अधिकारी केदार बारबोले यांच्या मार्गदर्शनाखाली पोलीस निरीक्षक आशिष आडसूळ यांच्या नेतृत्वातील पोलीस पथकाने केली. वाहनचोरी करणाऱ्या टोळ्यांविरोधात ही कारवाई जिल्हा पोलिसांसाठी मोठे यश मानली जात आहे.