भुसावळ :- गोरखपूर ते “सर एम. विश्वेश्वरैया टर्मिनल, बेंगलुरु” (एस.एम.व्ही.टी) बंगळुरू स्पेशल ट्रेन (०६५३०) मधील ऑन ड्युटी टी.सी.प्रदीप कुमार तिवारी यांच्यावर महिलेशी गैरवर्तन केल्याप्रकरणी लोहमार्ग पोलीस स्टेशन, मनमाड येथे गुन्हा दाखल करण्यात आला आहे.
याबाबत सध्या पुण्यात शिक्षण घेत असलेल्या कानपुर येथील तरुणीने दिलेल्या तक्रारीनुसार, ता.२२ मार्च रोजी कानपूरहून पुण्याला जाणाऱ्या ०६५३० एस.एम.व्ही.टी बंगळुरू स्पेशल ट्रेनमध्ये प्रवास करत होती.तिचे तिकीट आर.ए.सी असल्याने तिने टी.सी प्रदीप कुमार तिवारी यांच्याकडे सीट उपलब्धतेबाबत विचारणा केली.सुरुवातीला तिला बी -४ कोचमध्ये बसण्यास सांगण्यात आले,मात्र नंतर तिला ए-१ कोचमध्ये ५ नंबर सीट दिली.
तक्रारीनुसार,टी.सी प्रदीप कुमार तिवारी वारंवार तिच्या सीटवर येऊन बसले आणि तिला झोपण्यास सांगितले.काही वेळानंतर त्यांनी तिला अयोग्य प्रकारे स्पर्श केला.सुरुवातीला चुकून झाल्याचे समजून तिने दुर्लक्ष केले,मात्र त्यानंतर त्यांनी पुन्हा तिच्या जवळ येऊन बॅड टच केला.घाबरून ती वॉशरूममध्ये २०- २५ मिनिटे बसून राहिली.बाहेर आल्यानंतर तिला टी.सी प्रदीप कुमार तिवारी वॉशरूमच्या बाहेर उभे असलेले दिसले,यामुळे तिला भीती वाटली.
ही संपूर्ण घटना फिर्यादीने तिच्या वडिलांना फोनवर सांगितली.रेल्वे स्थानक भुसावळ येण्याच्या काही वेळ आधीपर्यंत टी.सी प्रदीप कुमार तिवारी यांनी तिचा पाठलाग करत राहून सतत गैरवर्तन केले.या प्रकरणी फिर्यादीने मनमाड लोहमार्ग पोलीस ठाण्यात तक्रार दाखल केली असून,सदर गुन्ह्याचा तपास सुरू आहे.सदरील गुन्ह्यातील संशयित आरोपी टी. सी.प्रदीप कुमार तिवारी हे ता.२३ रोजी पुष्पक एक्सप्रेस ने आल्याची गोपनीय माहिती लोहमार्ग पोलीस निरीक्षक सुधीर घायरकर यांना मिळाली असती त्यांनी तात्काळ सहाय्यक पोलीस निरीक्षक किसन राख,पोलीस हवालदार जयकुमार कोळी,विलास जाधव,बाबू मिर्झा अशांना दालनात बोलावून कारवाई चे आदेश दिले. तात्काळ पथक मिळालेल्या माहितीच्या आधारे पोहचून सापळा रचून भुसावळ शहरातील तापी नगर भागातून मित्रांच्या घरून सायंकाळी सव्वा पाच वाजेला ताब्यात घेवून लोहमार्ग पोलीस ठाण्यात जमा केले.
या घटनेनंतर रेल्वे प्रशासन आणि लोहामार्ग पोलिसांनी सतर्कता दाखवत पुढील कारवाई सुरू केली आहे.महिलांच्या सुरक्षेबाबत अशा घटना अत्यंत गंभीर असल्याने आरोपीवर कडक कारवाई करण्यात येणार असल्याचे सूत्रांनी सांगितले आहे.
