माळेगाव सहकारी साखर कारखाना निवडणुकीत राज्याचे उपमुख्यमंत्री अजित पवार यांनी देखील स्वत:चा उमेदवारी अर्ज दाखल केला आहे..
पोलीस वार्ता, बारामती : माळेगाव सहकारी साखर कारखान्याच्या 22 जून 2025 रोजी होणाऱ्या निवडणुकीची सद्या राज्यभरात चर्चा चालू आहे. कारण या निवडणुकीत काका विरुद्ध पुतण्या अशी लढत होणार असून राज्याचे उपमुख्यमंत्री अजित पवार यांनी देखील स्वत:चा उमेदवारी अर्ज दाखल केला आहे. बारामतीत लोकसभा व विधानसभा निवडणुकीनंतर पुन्हा एकदा पवार विरुद्ध पवार हा राजकीय संघर्ष दिसणार आहे. तर दुसरीकडे राष्ट्रवादी काँग्रेस (शरद पवार) गटाचे युवानेते युगेंद्र पवार यांच्या नेतृत्वाखाली ही निवडणूक लढली जाणार आहे.
तब्बल गेल्या 40 वर्षांनंतर उपमुख्यमंत्री अजित पवार यांनी या सहकारी साखर कारखान्याच्या निवडणुकीत भाग घेतला आहे. या निवडणुकीत ते थेट संचालकपदासाठी उमेदवारी करत आहेत. त्यांच्या नेतृत्वात ‘श्री नीलकंठेश्वर पॅनेल’ ने 21 उमेदवार रिंगणात उतरवले आहेत.
तर राष्ट्रवादीचे ज्येष्ठ नेते शरद पवार यांनी ‘बळीराजा सहकार बचाव पॅनेल’ चे 21 उमेदवार जाहीर केले आहे. त्यामुळे हा पुतण्या पवार विरुद्ध काका पवार संघर्ष रंगणार आहे.
माळेगाव सहकारी साखर कारखान्याच्या या निवडणुकीत एकूण 6 गटातून 19,549 तर ‘ब’ वर्गातून 102 सभासद आपला मतदानाचा हक्क बजावणार आहेत. ‘ब’ गटातील मतदारांवर उपमुख्यमंत्री अजित पवार यांनी लक्ष केंद्रीत केले आहे. या मतदारांसाठी प्रशासकीय भवन येथेच मतदान केंद्र आहे.
माळेगावमध्ये गट सर्वाधिक 2965 मतदार आहेत, तर माळेगाव बुद्रुकमध्ये 1767, माळेगाव खुर्दमध्ये 580, येळेगावमध्ये 194, पाहुणेवाडीमध्ये 140, ढाकाळे येथे 284 मतदार आहेत. गट क्र. 2 पणदरेमध्ये 3796 मतदार आहेत. या गटात पणदरे, मानाप्पाचीवाडी, पवईमाळ, सोनकसवाडी, कुरणेवाडी, धुमाळवाडी, खामगळवाडी या गावांचा समावेश आहे.
