बारामतीत पुण्यश्लोक अहिल्यादेवी होळकर शासकीय वैद्यकीय महाविद्यालय आणि सर्वोपचार रुग्णालयात डिजिटल डेंटल लॅब साकारणार

राज्य शासनाने या लॅबसाठी 1 कोटी 80 लाख रुपयांच्या अत्याधुनिक यंत्र व साधनसामग्री खरेदीस प्रशासकीय मान्यता दिली आहे..

पोलीस वार्ता, पुणे : बारामतीतील पुण्यश्लोक अहिल्यादेवी होळकर शासकीय वैद्यकीय महाविद्यालय व सर्वोपचार रुग्णालय आता आणखी सुसज्ज होणार आहे. येथील दंतचिकित्सा विभागासाठी डिजिटल डेंटल लॅब उभारण्यात येणार असून, राज्य शासनाने या लॅबसाठी 1 कोटी 80 लाख रुपयांच्या अत्याधुनिक यंत्र व साधनसामग्री खरेदीस प्रशासकीय मान्यता दिली आहे.

या संदर्भातील आदेश वैद्यकीय शिक्षण विभागाने नुकताच जारी केला असून, या डिजिटल डेंटल लॅबमुळे रुग्णांना अद्यावत सोयी-सुविधा आणि उपचार सेवा मिळणार आहेत. उपमुख्यमंत्री मा.श्री अजित पवार यांच्या पुढाकारामुळे आणि वैद्यकीय शिक्षण श्री. मंत्री हसन मुश्रीफ यांच्या सहकार्याने हा प्रकल्प बारामतीत उभा राहत आहे.

दरम्यान, महाविद्यालय व रुग्णालयासाठी 133 सुरक्षा रक्षकांच्या नियुक्तीचाही आदेश जारी करण्यात आला आहे. जळगाव येथे 129 आणि नागपूर येथे 39 सुरक्षा रक्षकांची भरती करण्यात येणार आहे. महाराष्ट्र राज्य सुरक्षा रक्षक महामंडळामार्फत ही भरती होणार असून, यासाठी 5 कोटी 17 लाख रुपयांची आर्थिक तरतूद करण्यात आली आहे. विद्यार्थ्यांची व रुग्णालयातील मौल्यवान सामग्रीची सुरक्षा सुनिश्चित करण्यासाठी तीन शिफ्टमध्ये 24 तास ही यंत्रणा कार्यरत राहणार आहे.

तसेच, रुग्णालयातील सेवा अधिक सक्षम करण्यासाठी अस्थिव्यंगोपचार, शल्यचिकित्सा, नेत्रशल्यचिकित्सा, सूक्ष्मजीवशास्त्र, औषधशास्त्र आणि बालरोगचिकित्सा या विभागांसाठी प्राध्यापकांची नियुक्तीही शासनाने केली आहे. यामुळे रुग्णसेवा आणि वैद्यकीय शिक्षण क्षेत्रात मोठी सुधारणा अपेक्षित आहे.

बारामतीसाठी ही एक सकारात्मक पावले असून, आरोग्यसेवा आणि शैक्षणिक सुविधा उंचावण्याच्या दिशेने हा महत्त्वाचा टप्पा ठरणार आहे.

✍️पोलीस वार्ता, प्रतिनिधी: वर्षा चव्हाण, बारामती, संपर्क: 9763852891