शेतकरी, आदिवासी बांधव, महिला बचतगट, मूर्तिकार, विविध कला, सांस्कृतिक क्षेत्रातील व्यक्तींना आपल्या वस्तूंची विक्री करण्यासाठी महत्वाचं व्यासपीठ…
पोलीस वार्ता, नाशिक : जिल्ह्यातील शेतकरी, आदिवासी बांधव, बचतगट, विविध कलाकार यांच्या वस्तूंच्या विक्रीसाठी एक दालन कलाग्राम उपलब्ध करून देण्यात येणार असून हे कलाग्राम व्यवस्थापनासाठी जिल्हा परिषदेकडे हस्तांतरित करण्यात येणार आहे. ‘कलाग्राम’ आगामी काळात महत्वाचे पर्यटन केंद्र होईल असा विश्वास राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी व्यक्त केला आहे.
मंत्री भुजबळ यांनी आज दि. 21 जून 2025 रोजी सकाळी कलग्रामच्या कामाची पाहणी केली. त्यावेळी ते बोलत होते. यावेळी म्हाडाचे सभापती रंजन ठाकरे, जिल्हा परिषदेच्या मुख्य कार्यकारी अधिकारी आशिमा मित्तल, पर्यटन विभागाचे प्रादेशिक अधिकारी जगदीश चव्हाण, माजी खासदार समीर भुजबळ, पर्यटन महामंडळाचे कार्यकारी अभियंता महेश बागूल, सरपंच गोविंद डंबाळे, उपसरपंच बाळासाहेब लांबे, ग्रामविकास विकास अधिकारी डी.एन.पाटील आदी उपस्थित होते.
मंत्री श्री. भुजबळ यांनी सांगितले की, माजी खासदार समीर भुजबळ यांनी आपल्या कार्यकाळात दिल्ली हटच्या धर्तीवर कलाग्राम निर्माण करण्यात आले. त्यासाठीस आता पर्यटन विभागाने 4.90 कोटी रुपये निधी मंजूर केला असून काम पूर्ण होत आहे. व्हिलेज संकल्पनेवर असलेल्या या कलाग्राममध्ये 99 गाळे आहेत.
शेतकरी, आदिवासी बांधव, महिला बचतगट, मूर्तिकार यासह विविध कला सांस्कृतिक क्षेत्रातील व्यक्तींना आपल्या वस्तूंची विक्री करण्यासाठी महत्वाचं व्यासपीठ उपलब्ध होणार आहे.
