भुसावळ – तालुक्यातील कंडारी गावातील वार्ड क्रमांक २ मध्ये सामाजिक सभागृह,अंगणवाडी, शिवगुफा येथे संरक्षण भिंतीचे काम सुरू असल्याकारणाने महिला शौचालयामध्ये जात नव्हत्या याचा फायदा इंजिनियर हमास खान, उपविभागीय अभियंता व संबंधित अधिकारी यांनी घेत महिलांचे सार्वजनिक शौचालय जे.सी.बी. मशीनव्दारे तोडले.या प्रकरणी दोषींविरुद्ध गुन्हा दाखल करण्याची मागणी ग्रामस्थांकडून होत आहे.
याबाबत ग्रामपंचायत सदस्य कंडारी सुरेखा सरजू तायडे यांनी उपविभागीय अभियंता सार्वजनिक बांधकाम उपविभाग कार्यालयाला दिनांक २३/१२/२०२५ रोजी तक्रार दिली होती.मात्र उपविभागीय अभियंता चंद्रशेखर तायडे यांनी तक्रारीकडे दुर्लक्ष केले.जिल्ह्यापरिषदेच्या माध्यमातून कंडारी गावातील वार्ड क्रमांक २ मध्ये पाच युनिटचे १० लाख रुपये किंमतीचे महिलांचे सार्वजनिक शौचालय सन. २०१८-१९ मध्ये बांधण्यात आले होते.संरक्षण भिंतीच्या कामास अडचण येत असल्याने इंजिनियर हमास खान,उपविभागीय अभियंता व संबंधित अधिकारी यांच्याशी संगनमत करीत जे.सी. बी मशीनेने महिलांचे सार्वजनिक शौचालय तोडल्याने महिलांची गैर सोय होत असल्याने ग्रामपंचायत सदस्य कंडारी सुरेखा सरजू तायडे यांनी दिनांक २/१/२०२६ रोजी उपविभागीय अभियंता सार्वजनिक बांधकाम उपविभाग कार्यालय भुसावळ यांना २६ जानेवारी २०२६ रोजी आमरण उपोषण बसणे बाबत अर्ज दिला होता. यानंतरही उपविभागीय अभियंता चंद्रशेखर तायडे यांनी महिलांचे सार्वजनिक शौचालय तोडले प्रकरण हलक्यात घेत आपल्या कामात मग्न राहिले.तक्रारदार यांनी दिलेल्या अर्जाची उपविभागीय अभियंता चंद्रशेखर. डी.तायडे यांच्याकडून कुठलीही दखल घेतली गेली नसल्याने अखेर सुरेखा तायडे यांनी दिनांक २६ जानेवारी २०२६ रोजी आमरण उपोषण सार्वजनिक बांधकाम उपविभाग कार्यालय भुसावळ आवारात सकाळी सात वाजेला केले.
सार्वजनिक बांधकाम उपविभाग कार्यालय भुसावळ येथे २६ जानेवारी रोजी ध्वजारोहण झाल्यानंतर उपविभागीय अभियंता यांनी उपोषण कर्त्यांनी भेट घेतली.या प्रकरणी आमदार साहेबांशी बोलणे झाले आहे.तुम्ही शौचालय बांधण्याबाबत नवीन ठराव दया.एप्रिल महिन्यात नवीन शौचालय बांधून देण्यात येईल असे उपविभागीय अभियंता चंद्रशेखर तायडे यांनी उपोषण कर्त्यांनी मौखिक आश्वासन दिले.
उपविभागीय अभियंता यांनी मागणी मान्य केल्या. त्यानंतर उपोषण कर्त्यांनी पाणी पिऊन उपोषण सोडले.
