‘विनोद मधुकर चौधरी’ असे वेदमाता गायत्री बहुउद्देशीय संस्था पिंपरी खुर्द, तालुका धरणगाव येथील लाचखोर सचिवाचे नाव आहे.
पोलीस वार्ता, जळगाव | 10 लाख रुपयांची लाच मागणी करून 2 लाख रुपयांच्या पहिल्या हप्त्याची लाच स्वीकारताना जळगाव येथील शैक्षणिक संस्था सचिव ‘एसीबी’च्या जाळ्यात सापडला. त्याच्याविरुद्ध रामानंद नगर पोलीस ठाण्यात गुन्हा दाखल करण्यात आला असून ‘विनोद मधुकर चौधरी’ असे वेदमाता गायत्री बहुउद्देशीय संस्था पिंपरी खुर्द, तालुका धरणगाव येथील लाचखोर सचिवाचे नाव आहे. या घटनेतील तक्रारदार एरंडोल तालुक्यातील पिंपळकोठा खुर्द येथील रहिवासी आहे. तक्रारदाराचा मुलगा वेदमाता गायत्री बहुउद्देशीय संस्था संचलित आदर्श प्राथमिक व माध्यमिक विद्यालय भोद खुर्द या ठिकाणी सन 2021 पासून अनुसूचित जाती या प्रवर्गातील शिपाई रिक्त पदावर नोकरीस होता. तक्रारदाराचा मुलगा नोकरीस लागतांना ‘सचिव विनोद चौधरी’ याने त्यांच्याकडून 7 लाख 70 हजार रुपये घेतले होते. त्यानंतर तक्रारदाराच्या शिपाई पदावरील मुलाचे वय कमी असल्याचे सांगून त्यास नोकरीवरुन गेल्या महिन्यात कमी केले होते. शिपाई पदाची जागा सन 2012 पासुन रिक्त पद दाखवून त्या जागेवर तक्रारदार यांच्या भाच्याला शिपाई पदावर नोकरी लावण्यासाठी, शासनाकडून मंजुरी आणून देण्याच्या मोबदल्यात तक्रारदार यांच्याकडे दि.15 ऑक्टोबर 2024 रोजी 10 लाख रुपयांची लाचेची मागणी सचिवाने केली.
