भुसावळ : शहरातील श्रीराम नगर परिसरातील दोन महिलांचे बस प्रवासादरम्यान तब्बल ३५ तोळे सोन्याचे दागिने अज्ञात चोरट्याने लंपास केल्याची धक्कादायक घटना शनिवारी सकाळी उघडकीस आली.
मिळालेल्या माहितीनुसार, संबंधित दोन्ही महिला शनिवारी सकाळी साडेआठ वाजेच्या सुमारास रावेर येथे लग्नसमारंभासाठी जाण्यासाठी भुसावळ बस स्थानकावरून भुसावळ-रावेर बसने प्रवास करत होत्या. यावेळी गर्दीचा फायदा घेत अज्ञात चोरट्याने त्यांच्या जवळील सुमारे ३५ तोळे सोन्याचे दागिने चोरून नेले.
घटना लक्षात येताच महिलांनी तातडीने बाजारपेठ पोलीस ठाणे गाठून तक्रार दिली. या घटनेच्या अनुषंगाने पोलिसांनी शहरातील सीसीटीव्ही कॅमेऱ्यांची तपासणी सुरू केली असून संशयिताचा शोध घेण्याचे प्रयत्न सुरू आहेत.
दरम्यान, या प्रकरणी पुढील कारवाईसाठी रावेर पोलीस ठाण्यात गुन्हा दाखल करण्याची प्रक्रिया सुरू असल्याची प्राथमिक माहिती सूत्रांकडून मिळाली आहे.
