नवरगाव धरण कालव्यामध्ये झाडाला आढळला मजुराचा मृतदेह; आत्महत्या की हत्या?

गळफास घेतलेल्या तरुणाच्या चेहऱ्यावर मारहाणीच्या खुणा निदर्शनास आल्याने ही आत्महत्या नसून घातपात झाल्याची दाट शक्यता दिसून येत आहे..

पोलीस वार्ता, मारेगाव (यवतमाळ) : नवरगाव धरण कालव्याच्या कामावर असलेल्या एका मजुराने गळफास लावून आत्महत्या केल्याची घटना बुधवारी मारेगाव तालुक्यातील नवरगाव येथे दुपारी 1 वाजेच्या सुमारास घडली आहे.

ता.दाईतना जि.परभणी येथील शेख समीर शेख जाफर, वय 21 वर्ष हा तरुण नवरगाव येथील धरण कालव्याच्या जलवाहिनी टाकण्याच्या कामावर मागील काही दिवसापासून काम करत होता. बुधवारी दि.18 जून रोजी कामावर सोबत अनेक मजूर कार्यरत असतांना देखील शेख समीर शेख जाफर या तरुणाचा मृतदेह कालव्याच्या कडेला असलेल्या झाडाला लटकलेल्या अवस्थेत आढळून आला. त्याने गळफास घेतला असल्याचे प्रथमदर्शी दिसत होते. त्याची दुचाकी कालव्याच्या वाहत्या पाण्यात पडलेल्या अवस्थेत दिसली. त्याने स्वतःच्या टी-शर्ट आणि पॅन्टच्या सहाय्याने गळफास घेतल्याचे दिसून आले.

परंतु मृतदेहाचे पाय जमिनीवर होते आणि मृत शेख समीर शेख जाफरच्या चेहऱ्यावर मारहाणीच्या खुणा निदर्शनास आल्याने ही आत्महत्या नसून घातपात झाल्याची दाट शक्यता दिसून येत आहे. मारेगाव पोलिसांनी घटनास्थळी पंचनामा करून मृतदेह तपासणीसाठी शासकीय रुग्णालय मारेगाव येथे नेण्यात आला आहे. पुढील अधिक तपास पोलीस करत आहे.

✍️पोलीस वार्ता, प्रतिनिधी: नरेश ठाकरे, (वणी) यवतमाळ, संपर्क: 9588664532