भुसावळ : तालुक्यातील दिपनगर येथील महाजनको औष्णिक विद्युत केंद्र रुग्णालयातील एका महिला कर्मचाऱ्याची नियुक्ती बनावट कागदपत्रांच्या आधारे झाल्याचा धक्कादायक दावा सूत्रांकडून करण्यात आला आहे. संबंधित महिला दहावी नापास असून, सुमारे ५० हजार रुपये देऊन तिने नोकरी मिळविल्याची चर्चा रुग्णालय परिसरात सुरू आहे.
सूत्रांच्या माहितीनुसार, महिलेच्या शैक्षणिक पात्रतेतील कथित त्रुटी आणि नियुक्ती प्रक्रियेतील अनियमिततेची माहिती वैद्यकीय अधिकारी व रुग्णालय व्यवस्थापकांना होती. याचाच गैरफायदा घेत संबंधितांकडून महिलेकडून दरमहा आर्थिक रक्कम उकळण्यात येत असल्याचा आरोप करण्यात येत आहे.
दरमहा पैसे देण्यास महिलेने नकार दिल्यानंतर तिच्यावर दबाव टाकण्यात आला. अखेर तिला पदावरून पायउतार करण्यात आल्याची माहिती समोर येत आहे. एवढेच नव्हे तर संबंधित महिलेला अश्लील संदेश पाठविण्यात आल्याचाही गंभीर आरोप सूत्रांनी केला आहे.
या संपूर्ण प्रकरणामुळे महाजनको रुग्णालयातील कारभाराबाबत अनेक प्रश्न उपस्थित होत असून, नियुक्ती प्रक्रिया, कथित आर्थिक व्यवहार आणि महिला कर्मचाऱ्यावरील वागणुकीची सखोल चौकशी करण्याची मागणी होत आहे. संबंधित अधिकाऱ्यांची बाजू समजू शकलेली नाही.
