भुसावळ : शहरातील बसस्थानक परिसरात प्रवाशांच्या गर्दीचा फायदा घेत सोन्याचे दागिने चोरणाऱ्या महिलेचा भुसावळ बाजारपेठ पोलिसांनी पर्दाफाश केला आहे. या कारवाईत सुमारे ३ लाख २० हजार रुपये किमतीची २२ ग्रॅम वजनाची सोन्याची पोत जप्त करण्यात आली आहे.
याबाबत अधिक माहिती अशी की, २३ एप्रिल रोजी सकाळी ८ ते ८.३० वाजेच्या सुमारास फिर्यादी महिला भुसावळ बसस्थानकात चोपडा बसमध्ये चढत असताना अज्ञात चोरट्याने त्यांच्या पर्समधील सोन्याची पोत लंपास केली होती. याप्रकरणी भुसावळ बाजारपेठ पोलिस ठाण्यात गुन्हा दाखल करण्यात आला होता.
दरम्यान, पोलिस अधीक्षक यांच्या मार्गदर्शनाखाली डी.बी. पथकाने तपास सुरू ठेवत गुप्त माहितीच्या आधारे संशयित महिलेचा शोध घेत तिला ताब्यात घेतले. चौकशीत तिने चोरीची कबुली दिली असून तिच्याकडून चोरीस गेलेली सोन्याची पोत जप्त करण्यात आली आहे.
सदर प्रकरणाचा पुढील तपास पोलिसांकडून सुरू असून आरोपी महिलेविरुद्ध कायदेशीर कारवाई करण्यात येत आहे.
