मोहरी खुर्द-(राम पाचकाळे) ता.भोर येथील केंद्रीय राखीव पोलीस दलाचे सेवानिवृत्त जवान एकनाथ नामदेव पांगारकर यांचा ग्रामस्थांच्या वतीने सेवापूर्ती गौरव समारंभ आयोजित करण्यात आला
होता,भारतीय सैन्यदलात २२ वर्षे अतुलनीय व निष्ठावंत सेवा बजावून सेवानिवृत्त झालेले मोहरी येथील सुपुत्र एकनाथ नामदेव पांगारकर यांचा सेवापूर्ती गौरव समारंभ मोहरी खुर्द येथे अत्यंत उत्साहपूर्ण आणि भावनिक वातावरणात संपन्न झाला.कार्यक्रमाची सुरुवात छत्रपती शिवाजी महाराज आणि भारत मातेच्या प्रतिमेला पुष्पहार अर्पण करून करण्यात आली.यावेळी सेवानिवृत्त सैनिक यांच्या आईचा आदर्श माता म्हणून गौरव करण्यात आला,तसेच सेवानिवृत्त जवान यांच्या पत्नी योगिता पांगारकर यांचा ग्रामस्थांच्या वतीने शाल व श्रीफळ देऊन यथोचित सत्कार करण्यात आला.एकनाथ पांगारकर यांनी आपल्या सैनिकी कारकिर्दीत सियाचीन,काश्मीर सीमा,छत्तीसगड सारख्या खडतर ठिकाणी सेवा बजावली आहे.त्याच बरोबर आसाम,बिहार व महाराष्ट्र येथे आलेल्या पुराच्या वेळी ही त्यांनी आपले योगदान दिले आहे,राष्ट्रसेवेसाठी दिलेल्या योगदानाबद्दल ग्रामस्थांनी तसेच मान्यवरांनी गौरवोद्गार काढले. आपल्या मनोगतात सैन्यातील शिस्त आणि राष्ट्रप्रेम हे माझ्यासाठी सर्वोच्च राहिले असून,आता निवृत्तीनंतरही समाजाच्या सेवेसाठी मी तत्पर राहीन, अशी भावना व्यक्त केली.यावेळी गावचे आजी-माजी सरपंच,उपसरपंच,आजी-माजी सैनिक आणि मोठ्या संख्येने पंचक्रोशीतील ग्रामस्थ उपस्थित होते.समारंभाच्या सुरूवातीला सैनिकाची सवाद्य मिरवणूक काढण्यात आली,ज्यात “भारत माता की जय” च्या घोषणांनी परिसर दणाणून गेला होता…..
