भुसावळ : शहरातील बाजारपेठ पोलीस ठाण्याच्या हद्दीतील राहुल नगर परिसरात सोमवारी (दि. ६) रात्री साडेदहा वाजेच्या सुमारास घरासमोर ओट्यावर बसलेल्या युवकावर अज्ञातांकडून गोळीबार करण्यात आल्याने परिसरात एकच खळबळ उडाली. या प्रकरणी पोलिसांनी तत्काळ कारवाई करत दोन संशयितांना ताब्यात घेतले असून, त्यांची कसून चौकशी सुरू आहे.
पोलिसांनी दिलेल्या प्राथमिक माहितीनुसार, राहुल नगर येथील रहिवासी गोलू रायसिंग पंडित हे घराजवळील ओट्यावर बसले होते. त्यावेळी बालाजी मंदिराच्या दिशेने मोटारसायकलवर आलेल्या दोन अनोळखी व्यक्तींनी त्यांच्या दिशेने एक गोळी झाडली. गोळीबारानंतर परिसरात घबराट पसरली.
घटनेची माहिती मिळताच बाजारपेठ पोलिसांनी तातडीने घटनास्थळी धाव घेत पंचनामा करून तपास सुरू केला. संशयितांचा शोध घेत पोलिसांनी अवघ्या काही वेळात दोन जणांना ताब्यात घेतले.
गोळीबारामागील नेमके कारण, आरोपी आणि पीडित यांच्यातील संबंध तसेच हल्ल्याचा उद्देश काय होता, याचा तपास पोलीस करीत आहेत.
