वाहनाची पाहणी केली असता त्यात कोंबून ठेवलेल्या अवस्थेत 60 गोवंशीय बैल आढळून आले. वाहनातील तिघांना पोलिसांनी ताब्यात घेतले,
पोलीस वार्ता, वणी : यवतमाळ जिल्ह्यातील पांढरकवडा उपविभागात गोवंश तस्करीविरोधात पोलीसांकडून मोठी कारवाई करत स्थानिक गुन्हे शाखेच्या वतीने अवैधरीत्या कत्तलीसाठी नेत असलेल्या गोवंश वाहतूक करणाऱ्या तीन जणांना अटक करण्यात आली आहे.
सविस्तर वृत्त असे की, स्थानिक गुन्हे शाखेचे पथक दि.17 मार्च 2025 रोजी पांढरकवडा उपविभागातील अवैध धंद्यांविरुद्ध आणि उघड गुन्ह्यांचे अन्वेषण करण्याच्या दृष्टीने गस्त घालत असताना पथकाला खात्रीलायक गोपनीय माहिती मिळाली की, नागपूर येथून एक कंटेनर गोवंशीय बैल कत्तलीसाठी पांढरकवडा मार्गे हैदराबाद येथे वाहतूक होणार आहे. ही माहिती मिळताच यवतमाळ गुन्हे शाखा पथकाने तातडीने पांढरकवडा पोलीस ठाणे हद्दीतील पिंपरी गावाजवळ सापळा लावला होता. काही वेळातच नागपूरकडून संशयास्पदरीत्या येणारा कंटेनर क्र.TS07 UE5029 दिसताच पोलिसांनी त्याला थांबवले व त्याची चौकशी केली, वाहनाची पाहणी केली असता त्यात कोंबून ठेवलेल्या अवस्थेत 60 गोवंशीय बैल आढळून आले. वाहनातील तिघांना पोलिसांनी ताब्यात घेतले, त्यांची विचारपूस केली असता त्यांनी बैल हैद्राबाद येथे कत्तलीसाठी नेत असल्याची कबुली दिली. पकडण्यात आलेल्या आरोपींची नावे- संतोष भरलाल लोधा, वय 59, रा.फुलपुरा, ता.सारंगपूर, जि.राजगड, मध्यप्रदेश, मशीद अली रशीद अली, वय 28, रा.दांडीयावाडी, ता.सारंगपूर, जि.राजगड, मध्यप्रदेश, शाकीर अली अमानत अली, वय 50, रा.दांडीयावाडी, ता.सारंगपूर, जि.राजगड, मध्यप्रदेश, अशी आहेत.
यवतमाळ पोलिसांनी पंचासमक्ष वाहनाची आणि आरोपींची झडती घेतली. या कारवाईत पुढीलप्रमाणे मुद्देमाल जप्त करण्यात आला आहे.
-
एक कंटेनर वाहन किंमत अंदाजे 30,00,000 रुपये,
-
60 गोवंश बैल किंमत अंदाजे 15,00,00 रुपये,
-
3 मोबाईल फोन किंमत अंदाजे 3,000 रुपये,
-
रोख रक्कम 2,200 रुपये,
एकूण 45 लाख 5 हजार 200 रुपये किमतीचा मुद्देमाल जप्त करण्यात आला आहे. पुढील कायदेशीर कारवाई प्रकरणी आरोपींविरुद्ध पांढरकवडा पोलीस ठाण्यात प्राणी क्रूरता प्रतिबंधक अधिनियम 1960 महाराष्ट्र प्राणी संरक्षण अधिनियम 1976 तसेच महाराष्ट्र पोलीस अधिनियम अंतर्गत विविध कलमांखाली गुन्हा नोंदवण्यात आला आहे.
