वणी वेकोली येथील कंपनीच्या व्यवस्थापकांविरोधात सलग दुसऱ्या दिवशी कामगारांचे उपोषण सुरूच..

सोमवारी दि.27 जानेवारी रोजी कंपनी व्यवस्थापकांकडून प्रतिनिधी स्वरूपात मॅनेजर व इनचार्ज यांनी उपोषणकर्त्यांची भेट घेत चर्चा केली, मंगळवारी सकाळी 10 वाजेपर्यंत निरोप देण्याचे आश्वासन दिले होते.

पोलीस वार्ता, यवतमाळ : वणी, वेकोली येथील एचडी एन्टरप्राईजेस व गौरव जॉईन्ट वेन्चर या प्रायव्हेट लिमिटेड कंपनीने 65 कामगारांना एकदम कामावरून काढून टाकल्यानंतर कंपनीविरोधात कामगारांनी दि.27 जानेवारी, सोमवारपासून आमरण उपोषणाला सुरुवात केली आहे. कंपनीच्या गेटसमोर कामगारांनी ठिय्या मांडला असून आज मंगळवारी उपोषणाचा दुसरा दिवस होता. मात्र संध्याकाळ पर्यंत कंपनी व्यवस्थापकांकडून उपोषणकर्त्यांशी व्यवस्थित पूर्ण बोलणी झालेली नाही. वेकोलिचे कामगार नेते टीएससी मेंबर संजय खाडे यांनी देखील उपोषणकर्त्यांना भेट देत पाठिंबा जाहीर केला आहे. कामगारांना न्याय मिळावा यासाठी वरिष्ट पातळीवर चर्चा करून जो पर्यंत कामागारांना न्याय मिळत नाही तोपर्यंत कामगारांसोबत राहण्याचे आश्वासन त्यांनी दिले.

गेल्या 5 वर्षांपासून एचडी एन्टरप्राईजेस व गौरव जॉइंट वेंचर प्रा.लि. ही कंपनी निलजई ओपनकास्ट खाणीसाठी ओ.बी.उत्खननाचे काम करते आहे. या कामासाठी एचडी एन्टरप्राईजेस या कंपनीचे 35 डंपर व गौरव जॉइंट वेंचर या कंपनीचे 60 डंपर कार्यरत आहेत. सध्या ही कंपनी पूर्ण क्षमतेने काम करीत आहे. मात्र असे असूनही या कंपनीत काम करणाऱ्या 65 कामगारांना नोकरीवरून एकदम कमी करण्यात आले. त्यामुळे कामगारांवर उपासमारीची वेळ आली आहे. कंपनीव्यवस्थापका विरोधात कामगारांनी यलगार पुकारला असून आमरण उपोषणाला सुरुवात केली आहे.

उपोषण स्थळी एसडीपीओ गणेश किंद्रे, पीएसआय रावसाहेब बुधवट, शिरपूरचे ठाणेदार माधव शिंदे यांच्यासह प्रमोद वासेकर, राजू अकंतवार, तेजराज बोढे, शंकर वऱ्हाटे, अशोक चिकटे तसेच विविध क्षेत्रातील मान्यवरांनी भेटी दिल्या. सोमवारी दि.27 जानेवारी रोजी कंपनी व्यवस्थापकांकडून प्रतिनिधी स्वरूपात मॅनेजर व इनचार्ज यांनी उपोषणकर्त्यांची भेट घेत चर्चा केली आणि कामगारांच्या मागण्या व्यवस्थापकांपर्यंत पोहोचवून मंगळवारी सकाळी 10 वाजेपर्यंत निरोप देण्याचे आश्वासन दिले होते. मात्र आज मंगळवार रात्री पर्यंत कंपनीकडून निरोप न आल्याने उपोषण सुरूच आहे.

संजय खाडे यांनी कामगारांचे उपोषण त्यांच्या हक्कासाठी असल्याचे सांगितले असून ते पुढे म्हणाले स्थानिकांना रोजगारात प्राधान्य देणे हे कंपनीचे कर्तव्य आहे. मात्र कंपनी भूमिपुत्रांवरच अन्याय करीत आहे. कामगारांचे उपोषण त्यांच्या हक्कासाठी असून कंपनीने त्यांना तात्काळ नोकरीवर रुजू करावे.

उपोषणकर्त्यांमध्ये विशाल गोवारदीपे, कानुजी लोनगाडगे, प्रभाकर खोब्रागडे, संदीप भोयर, रवि गुरनुले, प्रविण कातारकर, मनोज खाड़े, प्रकाश इंगोले, श्रीकांत निंदेकर, अरुण डाहुले, अनिल डोंगे, वासुदेव चिडे यांच्यासह सुमारे 40-50 कामगारी भाग घेतला असून उपोषणाचा लढा उभा केला आहे. याठिकाणी कोणताही अनुचित प्रकार घडू नये यासाठी वणी पोलीस प्रशासनाने चोख बंदोबस्त ठेवला आहे.

✍️पोलीस वार्ता, प्रतिनिधी: नरेश ठाकरे, (वणी) यवतमाळ, संपर्क: 9588664532