व्हीआयपी कॉलनी खूनप्रकरणी २४ तासांत तिघे जेरबंद

व्हीआयपी कॉलनी खूनप्रकरणी २४ तासांत तिघे जेरबंद
दोघांना ८ जूनपर्यंत पोलीस कोठडी; विधीसंघर्षित बालक बाल न्याय मंडळाकडे

भुसावळ : शहरातील व्हीआयपी कॉलनीत झालेल्या जीवघेण्Paragraphया हल्ल्यानंतर तरुणाचा मृत्यू झाल्याच्या खळबळजनक प्रकरणात भुसावळ पोलिसांनी अवघ्या २४ तासांत धडाकेबाज कारवाई करत तीन आरोपींना जेरबंद केले आहे. स्थानिक गुन्हे शाखा आणि भुसावळ बाजारपेठ पोलीस ठाण्याच्या संयुक्त पथकाने ही कारवाई करून गुन्ह्याच्या तपासाला वेग दिला आहे.
या प्रकरणातील मंगेश अंबादास काळे यांच्यावर काही दिवसांपूर्वी प्राणघातक हल्ला करण्यात आला होता. गंभीर जखमी अवस्थेत त्यांच्यावर उपचार सुरू असताना त्यांचा मृत्यू झाला. त्यानंतर या प्रकरणात खुनाचे कलम वाढविण्यात आले. गुन्ह्याचे गांभीर्य लक्षात घेऊन पोलिसांनी तातडीने तपासाची सूत्रे हाती घेत आरोपींचा शोध सुरू केला.

तांत्रिक विश्लेषण, सीसीटीव्ही फुटेज तसेच गुप्त बातमीदारांकडून मिळालेल्या माहितीच्या आधारे पोलिसांनी कुंदन अनिल पठारे (वय १९, रा. वाल्मिक नगर, भुसावळ), रोहित उर्फ दादू संजय नवगिरे (वय २१, रा. वाल्मिक नगर, भुसावळ) आणि एका विधीसंघर्षित बालकास ताब्यात घेतले. ताब्यात घेतलेल्या बालकास पुढील कार्यवाहीसाठी बाल निरीक्षक, जळगाव यांच्या स्वाधीन करण्यात आले आहे.
तपासादरम्यान आरोपींनी संगनमत करून बेकायदेशीर जमाव जमवित लोखंडी रॉड, चॉपर, हॉकी स्टिक आणि लाकडी दांड्यांच्या सहाय्याने मंगेश काळे यांच्यावर हल्ला केल्याचे निष्पन्न झाले. तसेच एका आरोपीने पीडिताच्या पत्नीला गावठी कट्टा दाखवून जीवे मारण्याची धमकी दिल्याची बाबही तपासात समोर आली आहे.
अटक करण्यात आलेल्या दोन्ही प्रमुख आरोपींना न्यायालयात हजर करण्यात आले असता न्यायालयाने त्यांना ८ जूनपर्यंत पोलीस कोठडी सुनावली. दरम्यान, या गुन्ह्यातील इतर फरार आरोपींच्या शोधासाठी पोलिसांची स्वतंत्र पथके रवाना करण्यात आली असून शोधमोहीम सुरू आहे.

जिल्हा पोलीस अधीक्षक श्रीकांत ढिवरे, अपर पोलीस अधीक्षक संदीप गावित आणि उपविभागीय पोलीस अधिकारी केदार बारबोले यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक राहुल गायकवाड तसेच भुसावळ बाजारपेठ पोलीस ठाण्याचे पोलीस निरीक्षक राहुल वाघ यांच्या नेतृत्वाखाली ही कारवाई करण्यात आली.

या पथकात पोलीस उपनिरीक्षक शरद बागल यांच्यासह स्थानिक गुन्हे शाखा व भुसावळ बाजारपेठ पोलीस ठाण्यातील अधिकारी व कर्मचाऱ्यांचा समावेश होता. पोलिसांच्या जलद आणि प्रभावी कारवाईमुळे शहरातील नागरिकांमध्ये समाधान व्यक्त होत असून पुढील तपास पोलीस निरीक्षक राहुल वाघ यांच्या मार्गदर्शनाखाली सुरू आहे.