मतदार यादी विशेष सखोल पुनरीक्षणाला नाशिक शहरात नागरिकांचा उत्स्फूर्त प्रतिसाद!

अर्जांचे वाटप व नोंदणी करण्याची अंतिम मुदत 29 जुलै 2026 असून मतदारांकडून Self Enumeration प्रक्रिया पूर्ण करून घेतली जात आहे..

पोलीस वार्ता, नाशिक | शहरातील नाशिक पूर्व विधानसभा-123 मतदारसंघात मतदान केंद्रस्तरीय अधिकारी (BLO) यांच्यामार्फत मतदार यादी विशेष सखोल पुनरीक्षण (Special Intensive Revision-SIR) मोहिमेंतर्गत घरोघरी जाऊन तसेच एकाच ठिकाणी विशेष कॅम्प आयोजित करून मतदारांकडून Self Enumeration प्रक्रिया पूर्ण करून घेतली जात आहे. मतदार नोंदणी अधिक अचूक व अद्ययावत करण्यासाठी चार रिक्षा लावून जनजागृती प्रचारही करण्यात येत असून नागरिकांकडून या उपक्रमाला चांगला प्रतिसाद मिळत असल्याची माहिती नाशिक पूर्व-123 मतदारसंघाचे सहा. निवडणूक निर्णय अधिकारी कुंदन हिरे यांनी दि.16 जुलै रोजी दिली.

नाशिक पूर्व-123 या विधानसभा मतदारसंघात एकूण 4 लाख 16 हजार 409 मतदार असून त्यापैकी 1 लाख 87 हजार 70 अर्जांचे वाटप करण्यात आले आहे. हे एकूण मतदारसंख्येच्या सुमारे 45 टक्के आहे. तसेच प्राप्त अर्जांपैकी 43 हजार 249 अर्जांचे डिजिटायझेशन म्हणजेच 11 टक्के काम पूर्ण झाले आहे. अर्जांचे वाटप व नोंदणी करण्याची अंतिम मुदत 29 जुलै 2026 असून या कालावधीत मोठ्या प्रमाणात काम पूर्ण होईल, असा अंदाज अधिकारी कुंदन हिरे यांनी व्यक्त केला आहे.