अनुसूचित जाती उपवर्गीकरण आणि झोपडपट्टी रहिवाशांच्या सुरक्षितेसाठी महसूल आयुक्त मा.गेडाम साहेब यांना निवेदन..
पोलीस वार्ता, नाशिक | पीपल्स रिपब्लिकन पार्टीच्या वतीने आज संपूर्ण महाराष्ट्रभर अनुसूचित जाती (SC) उपवर्गीकरणाच्या विरोधात निदर्शने आंदोलन करण्यात आले. नाशिकरोड येथे डॉ. बाबासाहेब आंबेडकर यांच्या पुतळ्याला अभिवादन करून नाशिक विभागीय आयुक्त कार्यालय येथे पीपल्स रिपब्लिकन पार्टी प्रदेशाध्यक्ष गणेशभाई उन्हवणे यांच्या आदेशाने धरणे आंदोलन व सरकारच्या उपवर्गीकरण निर्णया विरोधात निदर्शने करण्यात आले. यावेळी मोर्चाचे नेतृत्व ॲड.शशीभाई उन्हवणे यांनी केले.
यावेळी सरकारच्या अनुसूचित जातीच्या उपवर्गीकरणाच्या व दोन समाजात तेढ निर्माण करण्याच्या धोरणाविरुद्ध मोर्चेकरांनी घोषणा देत सरकारचा निषेध केला. तसेच शहरातील नाशिकरोड भागात असणाऱ्या चव्हाण मळा झोपडपट्टीतील रहिवाशांच्या बेघर करण्याचा व त्यांच्या सुरक्षेचा प्रश्न वरील या दोन मुद्द्यांवर विभागीय महसूल आयुक्त मा.गेडाम साहेब यांना निवेदन देण्यात आले.
निवेदनात चव्हाण मळा झोपडपट्टी परिसरातील नागरिक गेल्या 40 ते 50 वर्षांपासून तेथे वास्तव्यास असून काही बांधकाम व्यावसायिकांकडून गावगुंड पाठवून रहिवाशांवर दबाव टाकला जात असून त्यांना जागा खाली करण्यास धमकावले जात आहे. या प्रकारामुळे तेथील नागरिकांमध्ये भीतीचे वातावरण असून, त्यांच्या जीविताला धोका निर्माण झाल्याची परिस्थिती निर्माण झाली आहे.
निवेदनात पुढे असेही म्हटले आहे की, अनेक कुटुंबे वर्षानुवर्षे मोलमजुरी करून आपल्या कुटुंबाचा उदरनिर्वाह करत आहेत. त्यामुळे कोणत्याही प्रकारचा अन्याय होऊ नये, रहिवाशांना संरक्षण द्यावे आणि जीवनावश्यक तसेच अत्यावश्यक सेवा सुरळीत सुरू ठेवाव्यात, अशी मागणी विभागीय आयुक्तांकडे निवेदनात करण्यात आली आहे.
