कुंभमेळा यशस्वी व सुरक्षितपणे पार पाडण्यासाठी रेल्वे प्रशासन, पोलीस यंत्रणा व जिल्हा प्रशासनाने परस्पर समन्वयाने काम करावे..
पोलीस वार्ता, नाशिक : सिंहस्थ कुंभमेळा 2027 साठी देशभरातून येणाऱ्या भाविकांच्या सुरक्षित, सुरळीत व सोयीस्कर रेल्वे प्रवासासाठी रेल्वे विभागाकडून करण्यात येणाऱ्या नियोजनाचा आढावा आज दि.20 डिसेंबर रोजी कुंभमेळा आयुक्त शेखर सिंह यांनी जिल्हाधिकारी कार्यालयात आयोजित बैठकीत घेतला.
कुंभमेळ्यादरम्यान लाखो भाविक नाशिकमध्ये दाखल होणार असल्याने भारतीय रेल्वेचे सिंहस्थ कुंभमेळा काळात नाशिकसाठीचे व्यवस्थापन, अतिरिक्त रेल्वे गाड्यांचे नियोजन, रेल्वे स्थानकांवरील सोईसुविधा, भाविकांची गर्दी नियंत्रण पद्धत, सुरक्षा उपाययोजना तसेच इतर विविध विभागांमधील समन्वय याबाबत सविस्तर चर्चा बैठकीत करण्यात आली.
कुंभमेळा यशस्वी व सुरक्षितपणे पार पाडण्यासाठी रेल्वे प्रशासन, पोलीस यंत्रणा व जिल्हा प्रशासनाने परस्पर समन्वयाने काम करावे, असे आयुक्त शेखर सिंह यांनी यावेळी सांगितले. तसेच येणाऱ्या भाविकांच्या सुरक्षिततेला सर्वोच्च प्राधान्य देऊन रेल्वे स्थानकांवर स्वच्छता, पिण्याच्या पाण्याची सुविधा, वैद्यकीय सेवा, माहिती कक्ष तसेच आपत्कालीन व्यवस्थापन अधिक सक्षम करण्याच्या सूचना दिल्या. त्याचबरोबर ठरविलेल्या कृती आराखड्यानुसार सर्व संबंधित विभागांनी वेळेत कामकाज पूर्ण करावे, असे आयुक्तांनी सूचित केले. रेल्वे विभाग करीत असलेल्या उपाययोजनांची माहिती अभियंता पंकज धावरे यांनी दिली.
