सर्वधर्मसमभाव संदेश देत भगूर-देवळालीत ईद-ए-मिलाद सण आनंदात साजरा!

जुलूस रॅलीच स्वागत करून मुस्लिम बांधवांना शुभेच्छा देण्यात आल्या व हिंदू-मुस्लिम सर्वधर्मसमभाव हा संदेश दिला..

पोलीस वार्ता, देवळाली | मुस्लिम म्हणजे इस्लाम धर्माचे संस्थापक हजरत मोहम्मद पैगंबर यांच्या जयंतीनिमित्त संपूर्ण जगात ईद-ए-मिलाद हा सण मुस्लिम बांधवांकडून साजरा केला जातो. भारतात देखील मोठ्या प्रमाणात हा सण आनंदाने साजरा होतो. यंदा दि. 26 ऑगस्ट रोजी मुस्लिम बांधवांकडून ईद-ए-मिलाद साजरा झाला.

नाशिकमधील देवळाली-भगूर परिसरात मुस्लिम बांधवांकडून ईद-ए-मिलाद निमित्त जुलूस रॅलीचे आयोजन करण्यात आले होते. ही जुलूस रॅली देवळाली कॅम्प येथील ऐतिहासिक झेंडा चौकात येताच काही संघटनांच्या वतीने रॅलीच स्वागत करून मुस्लिम बांधवांना शुभेच्छा देण्यात आल्या व हिंदू-मुस्लिम सर्वधर्मसमभाव हा संदेश समाजाला देण्यात आला. यावेळी सत्यशोधक बहुजन आघाडी, झेंडा चौक मित्र मंडळ, कॅन्टोन्मेंट बोर्ड यांचे पदाधिकारी व सदस्य यांच्यावतीने हा शुभेच्छा कार्यक्रम आयोजित करण्यात आला होता. तसेच संपूर्ण कार्यक्रमाचे उत्कृष्ट नियोजन भारत वाघमारे यांनी केले. पुढे रॅली मौलाना आझाद चौक येथे गेल्यावर नगरसेवक फरीद शेख यांच्यासह मुस्लिम बांधवांनी ईद-ए-मिलाद सण उत्साहात साजरा केला.

यावेळी माजी नगरसेवक सचिन ठाकरे, भगवानजी कटारिया, राजेंद्र जाधव, हाजी मोहम्मद रफिक, फिरोज खान, अमिन खान, रजाक बोरिंगवाला, शब्बीर रंगरेज, शायरा शेख, दादा बुखारी, रवींद्र भदाणे, सुरेश कदम, जेम्स बर्नार्ड, अर्चना पारचा, निलेश बंगाली, केतन सोनवणे, किरण काळे, मनीष ससाणे, सुशील चांदणे आदी मान्यवर उपस्थित होते.