मुक्ताईनगर शहरात अतिक्रमणाविरोधात प्रशासनाचा बडगा? व्यावसायिकांमध्ये कारवाईमुळे खळबळ

नागरिकांनी अतिक्रमण हटविण्याच्या कारवाईला पाठिंबा देत रस्ते मोकळे करण्याची मागणी प्रशासनाला केली आहे..

पोलीस वार्ता, मुक्ताईनगर | शहरात सार्वजनिक रस्ते, फुटपाथ आणि शासकीय जागांवरील अतिक्रमणाविरोधात लवकरच कारवाई होण्याची शक्यता व्यक्त केली जात असून यामुळे शहरातील अनेक व्यावसायिकांमध्ये खळबळ उडाली आहे. संभाव्य कारवाईच्या चर्चेनंतर काही व्यापाऱ्यांनी स्वतःहून दुकानाबाहेरील अतिक्रमण व साहित्य हटविण्यास सुरुवात केल्याचे चित्र शहरात दिसून येत आहे.

शहरातील वाढत्या अतिक्रमणामुळे वाहतूक कोंडी, पायी चालणाऱ्यांना होणारा त्रास आणि अपघाताचा धोका वाढत असल्याने प्रशासनाकडून हे कठोर पावले उचलले जात असल्याची चर्चा आहे. मात्र याबाबत संबंधित प्रशासनाकडून अद्याप कोणतीही अधिकृत माहिती देण्यात आलेली नाही.

नागरिकांनी अतिक्रमण हटविण्याच्या कारवाईला पाठिंबा देत शहरातील रस्ते मोकळे करण्याची मागणी प्रशासनाला केली आहे. नियमांचे उल्लंघन करणाऱ्यांनी प्रशासनाच्या कारवाईची वाट न पाहता स्वखुशीने अतिक्रमण हटवावे. असेही अनेक नागरिकांचे मत आहे.