शेतजमिनीच्या मोजणीसाठी आवश्यक कागदपत्रांच्या साक्षांकित प्रती देण्यासाठी मागितली होती लाच..
पोलीस वार्ता, जळगाव | शेतजमिनीच्या मोजणीसाठी आवश्यक असलेल्या स्कीम पत्रक व टिपण उताऱ्याच्या साक्षांकित प्रती देण्यासाठी 700/- रुपयांची लाच मागून तडजोडीनंतर 200/- रुपये स्वीकारणाऱ्या जामनेर येथील भूमी अभिलेख विभागातील कर्मचाऱ्याला लाचलुचपत प्रतिबंधक विभागाने (एसीबी) मंगळवारी दि.8 सप्टेंबर रोजी रंगेहात पकडले आहे. त्या लाचखोर कर्मचाऱ्याचे नाव भगवान गायकवाड, वय-59, नोकरी- भूमापक प्रतिलिपी, वर्ग-3, भूमी अभिलेख कार्यालय, जामनेर असे आहे.
मिळालेल्या माहितीनुसार तक्रारदार यांना त्यांच्या जामनेर तालुक्यातील शेतीची मोजणी करण्यासाठी स्कीम पत्रक व टिपण उताऱ्याच्या साक्षांकित प्रती आवश्यक होत्या. यासाठी त्यांनी दि.2 सप्टेंबर 2026 रोजी भूमी अभिलेख कार्यालय, जामनेर येथे रितसर अर्ज केला होता. संबंधित कागदपत्रांच्या प्रती देण्यासाठी कर्मचारी गायकवाड यांनी तक्रारदाराकडे 700/- रुपयांची मागणी केल्याचे, तक्रारदार याने दि.7 सप्टेंबर रोजी एसीबी, जळगाव यांना सांगितले. या तक्रारीच्या अनुषंगाने पंचांसमक्ष पडताळणी केली असता कर्मचारी गायकवाड यांनी तडजोडीनंतर 200/- रुपये लाचेची मागणी करून ती स्वीकारण्यास संमती दर्शविली. त्यानंतर मंगळवारी जामनेर येथील भूमी अभिलेख कार्यालयात एसीबीने सापळा रचला. यावेळी गायकवाड यांनी 200 रुपयांची लाच स्वीकारल्याचे निष्पन्न झाल्याने त्यांना लाचलुचपत प्रतिबंधक विभागाने ताब्यात घेतले.
