फरार आरोपी चेतन सुर्यभान पाटील हा नशिराबाद बसस्थानक परिसरात गावठी कट्टा घेऊन फिरत असल्याची माहिती मिळाली होती..
पोलीस वार्ता, भुसावळ : दरोड्याच्या गुन्ह्यात फरार असलेल्या आरोपीस नशिराबाद पोललीसांनी कोंबिंग ऑपरेशनदरम्यान गावठी कट्ट्यासह अटक केली आहे. ही कारवाई सोमवारी, दि.23 मार्च 2026 रोजी सायंकाळी करण्यात आली. पोलीस अधीक्षकांच्या आदेशान्वये नशिराबाद पोलीस ठाण्याच्या हद्दीत कोंबिंग ऑपरेशन सुरू असताना सहा. पोनि. योगिता नारखेडे यांना गुप्त माहिती मिळाली की, भुसावळ शहर पोलीस ठाण्यात नमूद गु.र.क्र- 288/2025 मधील फरार आरोपी चेतन सुर्यभान पाटील (वय-18) रा. वरची अळी, नशिराबाद हा बसस्थानक परिसरात गावठी कट्टा घेऊन फिरत आहे.
माहितीच्या आधारे पोलीस पथकाने तत्काळ सापळा रचून रात्री सुमारे 8.20 वाजता आरोपीस ताब्यात घेतले. त्याच्याकडून एक लोखंडी चंदेरी रंगाचा, काळ्या प्लास्टिकच्या मुठीचा गावठी कट्टा तसेच एक डमी कट्टा जप्त करण्यात आला. या प्रकरणी नशिराबाद पोलीस ठाण्यात गुन्हा क्रमांक 93/2026 शस्त्र अधिनियम कलम 3/25 अन्वये दाखल करण्यात आला असून पुढील तपास पोलीस प्रशांत विरणारे करीत आहेत.
