वणी, कृष्णापूर येथे शेतमजुराच्या घराला शॉर्ट सर्किटमुळे आग; सुदैवाने जीवितहानी नाही..

आमदार संजय देरकर यांनी दुर्घटनेची दखल घेत त्वरित कृष्णापूर येथे घटनास्थळी भेट दिली. त्यांनी बाबाराव पाचभाई व त्यांच्या कुटुंबीयांची विचारपूस करत त्यांचे सांत्वन केले.

पोलीस वार्ता, यवतमाळ | वणी तालुक्यातील कृष्णापूर येथे बाबाराव महादेव पाचभाई या शेतमजुराच्या घराला शॉर्ट सर्किटमुळे आग लागली. सुदैवाने कोणतीही जीवितहानी झाली नाही, मात्र घरातील सर्व साहित्य जळून खाक झाले. या घटनेने पाचभाई कुटुंबाच्या आयुष्याला मोठा फटका बसला आहे. संसार उद्ध्वस्त झाल्याने कुटुंब उघड्यावर आले असून त्यांच्यावर दुःखाचे डोंगर कोसळले आहे.

घटनेची मिळताच वणी विधानसभा मतदारसंघाचे महविकास आघाडीचे नवनिर्वाचित आमदार संजय देरकर यांनी दुर्घटनेची दखल घेत त्वरित कृष्णापूर येथे घटनास्थळी भेट दिली. त्यांनी बाबाराव पाचभाई व त्यांच्या कुटुंबीयांची विचारपूस करत त्यांचे सांत्वन केले आणि संकटावर मात करण्यासाठी धीर दिला. या भेटीत आमदार संजय देरकर यांनी प्रशासनाला तातडीने घटनास्थळाचा पंचनामा करण्याचे निर्देश दिले असून आगीत झालेल्या नुकसानीचे योग्य मोजमाप करून अहवाल तयार करण्यास सांगितले. नुकसानग्रस्त कुटुंबाला मदत मिळवून देण्याचे आश्वासन दिले.

 या भेटी दरम्यान मा.आमदार संजय देरकर यांच्यासोबत राजेंद्र इद्दे व स्थानिक कार्यकर्ते उपस्थित होते. त्यांनीही कुटुंबाच्या पुनर्वसनासाठी सहकार्य करण्याची तयारी दर्शवली. स्थानिक कार्यकर्त्यांनी या घटनेनंतर कुटुंबाला अन्न, वस्त्र आणि इतर आवश्यक गोष्टी पुरविण्याची जबाबदारी घेतली आहे. प्रशासनाकडून मिळणाऱ्या मदतीबरोबरच समाजानेही त्यांच्या पुनर्वसनासाठी योगदान द्यावे, असे आवाहन मा.आमदार संजय देरकर यांनी केले आहे. आमदारांच्या सक्रिय सहभागामुळे पाचभाई कुटुंबाला आशेचा किरण मिळाला असून, त्यांच्या संसाराला पुन्हा नव्याने सुरुवात करण्यासाठी योग्य तो आधार मिळेल, अशी अपेक्षा आहे.

✍️पोलीस वार्ता, प्रतिनिधी: नरेश ठाकरे, (वणी) यवतमाळ, संपर्क: 9588664532