भुसावळ, दि. २९ नोव्हेंबर २०२५ (निलेश फिरके) भुसावळ नगर परिषदेच्या येणाऱ्या निवडणुकीत पाथरवट समाजाने आपला स्पष्ट पाठींबा जाहीर केला आहे. समाजाच्या बैठकीत एकमताने घेतलेल्या निर्णयानुसार, नगराध्यक्षपदासाठी उमेदवार रजनी संजय सावकारे यांना तर प्रभाग क्रमांक ८ मधील नगरसेवक पदासाठी उमेदवार सौ. अनिता सतीश सपकाळे यांना पाथरवट समाजाचा जाहीर आणि पूर्ण पाठींबा देण्यात आला आहे.
पाथरवट समाजाचे भुसावळ शहरातील प्रमुख पदाधिकारी तथा समाज बांधवांनी आज एका विशेष बैठकीत हा निर्णय घेतला. बैठकीत बोलताना समाजाचे अध्यक्ष तथा पदाधिकाऱ्यांनी सांगितले की, “रजनी संजय सावकारे आणि अनिता सतीश सपकाळे या दोन्ही उमेदवारांनी आतापर्यंत समाजाच्या विकासासाठी आणि हक्कांसाठी नेहमीच पुढाकार घेतला आहे. त्यामुळे यावेळी नगर परिषदेत समाजाचा आवाज अधिक बुलंद करण्यासाठी आम्ही त्यांना एकसंघ पाठींबा देत आहोत.”
प्रभाग क्रमांक ८ मध्ये पाथरवट समाजाची मोठ्या संख्येने वस्ती असल्याने हा पाठींबा उमेदवार सौ. अनिता सतीश सपकाळे यांच्या विजयात निर्णायक ठरण्याची शक्यता व्यक्त केली जात आहे. तसेच नगराध्यक्षपदासाठी रजनी सावकारे यांना मिळालेला हा पाठींबा शहराच्या राजकीय वर्तुळात मोठ्या चर्चेचा विषय ठरला आहे.
पाथरवट समाजाच्या या जाहीर पाठींब्यामुळे भुसावळ नगर परिषद निवडणुकीतील चुरस आणखी वाढली असून, आगामी काळात इतर समाज आणि संघटनांकडूनही असे पाठींबे जाहीर होण्याची शक्यता आहे.
