देवळा येथे सासरच्या जाचाला कंटाळून नवविवाहितेची आत्महत्या; पतीसह चौघांना पोलीसांकडून अटक..
पोलीस वार्ता, देवळा : लग्न होऊन फक्त सात महिने झाले असताना सासरच्या जाचाला कंटाळून एका नवविवाहितेने आपले जीवन संपवल्याची दुर्दैवी घटना देवळा नगरपंचायत हद्दीतील इंदिरानगर येथे घडली आहे. दुचाकी घेण्यासाठी माहेरहून पैसे आणावेत, या मागणीसाठी वारंवार मानसिक व शारीरिक छळ सहन करावा लागल्याने नव विवाहितेने आत्महत्या केली असल्याची तक्रार नवविवाहितेच्या नातेवाईकांनी देवळा पोलिसात दिल्याने या प्रकरणी पतीसह चौघांविरुद्ध देवळा पोलीस ठाण्यात गुन्हा दाखल करून त्यांना अटक करण्यात आली आहे.
देवळा पोलीस ठाण्यात शंकर वसंत पवार यांनी दिलेल्या फिर्यादीनुसार, अंबिका मयुर पवार (वय १९, रा. इंदिरा नगर, देवळा) हिच्यावर सासरच्या मंडळींकडून पैशासाठी वारंवार छळ केला जात होता. पती मयुर अंबादास पवार, सासू निर्मला अंबादास पवार, सासरे अंबादास पंडित पवार आणि नणंद पिंकी अंबादास पवार यांनी संगनमत करून अंबिकाला माहेरहून २०,००० रुपये आणण्यासाठी तगादा लावला होता. पैसे न मिळाल्याने तिला वेळोवेळी शिवीगाळ, दमदाटी आणि मारहाण करण्यात येत होती. ३१ मार्च रोजी अंबिकाला मारहाण करून घरातून हाकलून दिले होते अशाप्रसंगी शेजारी राहणाऱ्या आपल्या आईकडे गेली आणि १ एप्रिल रोजी सायंकाळी ७ वाजता अंबिकाने आपल्या आईच्या घरी गळफास घेऊन आत्महत्या करण्याचा प्रयत्न केला. त्यावेळी आई सखुबाई हिने पाहताच तात्काळ दरवाजा तोडून तिला खाली उतरवले व उपचारासाठी सटाणा येथील रुग्णालयात दाखल केले. प्रकृती गंभीर असल्याने तिला नाशिक येथे हलवण्यात आले, मात्र वाटेतच तिचा मृत्यू झाला. देवळा ग्रामीण रुग्णालयात तिच्यावर शवविच्छेदन करण्यात आले.
