पीएसआय भारती काळे यांच्या अभ्यासपूर्ण युक्तिवादाला यश
भुसावळ – येथील बाजारपेठ पोलीस ठाण्यात दाखल गंभीर गुन्ह्यात न्यायालयीन कोठडीत असलेल्या आरोपीची पुढील तपासासाठी पोलीस कोठडी मंजूर करण्यात पोलिसांना यश आले आहे. भारतीय न्याय संहिता कलम ६४ (२) व इतर कलमान्वये दाखल असलेल्या गुन्ह्यात भारतीय नागरिक सुरक्षा संहिता २०२३ मधील नव्या तरतुदींचा प्रभावी वापर करत पोलिसांनी न्यायालयात भक्कम बाजू मांडली.
सदर प्रकरणातील आरोपीस १७ मे २०२६ रोजी तपास अधिकारी पोलीस उपनिरीक्षक भारती सागर काळे, पोलीस अंमलदार जितेंद्र संतोष विटकर व शोध पथकाने अटक केली होती. आरोपीला प्रथम न्यायालयात हजर केले असता न्यायालयीन कोठडी सुनावण्यात आली होती. मात्र, तपासातील महत्त्वाचे मुद्दे, आरोपीकडून आवश्यक सखोल चौकशी तसेच गुन्ह्याच्या अनुषंगाने पुढील तपासाची गरज लक्षात घेऊन पीएसआय भारती काळे यांनी न्यायालयात अभ्यासपूर्ण मांडणी केली.
या प्रकरणात सहाय्यक सरकारी अभियोक्ता भूषण महेश भामरे यांनी कायदेशीर बाबींचा बारकाईने अभ्यास करून ठोस युक्तिवाद केला. अतिरिक्त सरकारी अभियोक्ता राजू तडवी यांच्या मार्गदर्शनामुळे पोलिसांची बाजू अधिक मजबूत झाली. तसेच कोर्ट पैरवी हेड कॉन्स्टेबल गणेश लक्ष्मण शिरसाट यांनी आवश्यक कागदपत्रांची तातडीने पूर्तता करून न्यायालयीन प्रक्रियेत महत्त्वाची भूमिका बजावली.
पोलीस अधीक्षक श्रीकांत धिवरे, उपविभागीय पोलीस अधिकारी केदार बारबोले तसेच पोलीस निरीक्षक राहुल वाघ यांच्या मार्गदर्शनाखाली ही कारवाई करण्यात आली. न्यायालयाने आरोपीची पोलीस कोठडी मंजूर केल्याने पुढील तपास अधिक वेगाने व प्रभावीपणे होणार असल्याची माहिती पोलिसांनी दिली.
