ठाणे जिल्ह्यातील 18 विधानसभा मतदारसंघात मतदान केंद्रावर मतदारांसाठी बजावण्यात येणाऱ्या सोयीसुविधांचा आढावा जिल्हा निवडणूक निर्णय अधिकारी यांनी घेतला.
पोलीस वार्ता, ठाणे: महाराष्ट्र राज्यातील विधानसभा सार्वत्रिक निवडणुक 2024 साठी ठाणे जिल्हा प्रशासन सज्ज झाले आहे. येत्या 20 नोव्हेंबर ला होणार्या मतदान प्रक्रियेसाठी जिल्ह्यातील 18 विधानसभा मतदारसंघात मतदान केंद्रावर मतदारांसाठी बजावण्यात येणाऱ्या सोयीसुविधांचा आढावा जिल्हाधिकारी तथा जिल्हा निवडणूक निर्णय अधिकारी श्री.अशोक शिनगारे यांनी घेतला. केंद्रावर मतदारांना कोणत्याही प्रकारच्या गैरसोई होऊ नये व मतदान शांततेत पार पडावे, यासाठी प्रत्येकाने जबाबदारीने व गांभीर्य लक्ष देवून काम करण्याचे निर्देश सर्वांना दिले.
ठाणे शहर महानगरपालिका हद्दीत 1 हजार 546 मतदान केंद्रे तर कल्याण-डोंबिवली महानगरपालिका हद्दीत 1 हजार 261 मतदान केंद्रे, ठाणे ग्रामीण भागात 1 हजार 124 मतदान केंद्रे, नवी मुंबई महापालिका हद्दीत 831 मतदान केंद्रे, मीरा-भाईंदर महानगरपालिका हद्दीत 755 मतदान केंद्रे, भिवंडी महानगरपालिका हद्दीत 586 मतदान केंद्रे, उल्हासनगर महानगरपालिका 399 मतदान केंद्रे, तर सर्व नगरपालिका हद्दीत 453 मतदान केंद्रे आहेत. या सर्व मतदान केंद्रावर देण्यात येणार्या सोईसुविधांची जबाबदारी ही संबंधित महानगरपालिका, नगरपालिका यांची असून ग्रामीण भागातील मतदान केंद्राची जबाबदारी ही जिल्हा परिषदेकडे आहे. या सर्व मतदान केंद्राची पाहणी ही येथील आस्थापनातील अभियंत्यांनी प्रत्यक्ष जागेवर जावून पाहणी करण्याचे निर्देश जिल्हा निवडणूक निर्णय अधिकारी श्री.अशोक शिनगारे यांनी यावेळी दिले. तसेच एखाद्या मतदान केंद्रावर अडचण निर्माण होत असेल तर त्याची माहिती त्वरित कळवावी, त्यावर योग्य तो तोडगा काढण्यात येईल, असेही जिल्हा निवडणूक निर्णय अधिकारी यांनी नमूद केले. बैठकीस उपजिल्हा निवडणूक अधिकारी वैशाली माने, महापालिकांचे नगर अभियंता, तसेच ठाणे जिल्ह्यातील 18 विधानसभा मतदारसंघात मतदान केंद्रावर सोईसुविधांसाठी कार्यरत असलेले अभियंते देखील उपस्थित होते.
यावेळी बैठकीत ठाणे जिल्ह्यातील 18 विधानसभा मतदारसंघातील बूथ व त्याठिकाणी करण्यात येणाऱ्या सुविधा या संदर्भात माहिती जिल्हा निवडणूक निर्णय अधिकारी श्री.अशोक शिनगारे यांनी सादरीकरणाच्या माध्यमातून अभियंत्यांकडून घेतली. तसेच विधानसभा मतदान केंद्राची पाहणी आपण स्वत: तसेच प्रत्येक विधानसभा मतदारसंघात नियुक्त करण्यात आलेल्या निवडणूक निर्णय अधिकारी यांच्यामार्फत करण्यात येणार असल्याचे ही त्यांनी यावेळी सर्वांना सांगितले.
-
मतदान केंद्रावर सुविधा पुरविण्याच्या सुचना!
महाराष्ट्रातील ठाणे जिल्हयातील सार्वत्रिक 18 विधानसभा मतदारसंघातील सर्व मतदान केंद्रावर..
-
मतदारांसाठी सूचना फलक,
-
दिशादर्शक,
-
दिव्यांगासाठी रॅम्पची सुविधा,
-
मतदार सहाय्य केंद्र,
-
पुरेशी व्यवस्था,
-
मंडप व्यवस्था,
-
पिण्याच्या पाण्याची सोय,
-
स्वच्छ स्वच्छतागृहे,
-
प्रतिक्षालय,
-
रांगेतील मतदारांसाठी खुर्च्यांची व्यवस्था,
-
तसेच मंडपात असलेल्या मतदान केंद्रानजीक मोबाईल टॉयलेटची व्यवस्था,
-
प्रथमोपचार सुविधा,
-
मतदान केंद्रावर पाळणाघर,
-
तसेच दिव्यांगासाठी व्हीलचेअरची सुविधा,
-
पार्टीशन मध्ये तयार करण्यात आलेल्या मतदान केंद्रावर लावण्यात येणार्या रांगांसाठी जागेची उपलब्धता.
