भुसावळ : शहरातील जामनेर रोडवरील साक्षी ऑटो पार्ट्स या दुकानात नोट बदलण्याच्या कारणावरून वाद झाल्यानंतर दुकानदारावर लोखंडी पाईपने जीवघेणा हल्ला करण्यात आल्याची घटना मंगळवार (ता. २७) रोजी सायंकाळी साडेसात वाजेच्या सुमारास घडली.या प्रकरणी ठानसिंग मेहरे (पूर्ण नाव अज्ञात) व त्यांचा मुलगा मोहीत ठानसिंग मेहरे (वय २०, रा. शिवपूर कन्हाळा) यांच्यासह अन्य ७ ते ८ जणांविरुद्ध गुन्हा दाखल करण्यात आला आहे.
मिळालेल्या माहितीनुसार, साक्षी ऑटो पार्ट्स येथे नोट बदलण्याच्या कारणावरून वाद निर्माण झाला. वादाचे रूपांतर हाणामारीत होत आरोपींनी हातातील लोखंडी पाईपने दुकानदारावर हल्ला केला. हा वार चुकवण्याचा प्रयत्न करताना दुकानदाराच्या डोक्याला दुखापत झाली. त्यानंतर इतर आरोपींनीही चापटा-बुक्क्यांनी मारहाण केली.
तसेच आरोपींनी दुकानात दगड व विटा फेकून तोडफोड केली. दुकानातील टायर व इतर साहित्य फेकून नुकसान केले. लोखंडी पाईप व लाकडी दांड्यांनी मारहाण करत “मारून टाकू” अशी धमकीही दिल्याचे फिर्यादीत नमूद आहे.
या घटनेप्रकरणी अजय कन्हैयालाल माखीजा यांनी बाजारपेठ पोलीस स्टेशन येथे दिलेल्या फिर्यादीवरून गुन्हा दाखल करण्यात आला असून पुढील तपास पोलीस करत आहेत
