भुसावळ : पाठपुराव्याला अखेर भरीव यश मिळत कुऱ्हा पानाचे उपसा सिंचन योजनेच्या क्र. १ व क्र. २ या महत्त्वपूर्ण योजनांना राज्य शासनाकडून सुमारे ₹२८१ कोटींची तत्वत: मान्यता मिळाली आहे. या निर्णयामुळे भुसावळ विधानसभा मतदारसंघातील कृषी विकासाला मोठी चालना मिळणार असून शेतकऱ्यांसाठी हा दिलासादायक टप्पा ठरणार आहे.
या योजनेअंतर्गत कुऱ्हा पानाचे (१६५०.७२० हे.), खंडाळे (४१२.७९४ हे.), मोंढाळे (८०५.१९ हे.) व शिंदी (८८८.१२० हे.) या गावांतील एकूण ३७५६.८२ हेक्टर क्षेत्र ओलिताखाली येणार आहे. सिंचन सुविधांमध्ये वाढ झाल्यामुळे शेती उत्पादनक्षमता वाढण्यास मदत होणार असून शेतकऱ्यांच्या आर्थिक सक्षमीकरणाला बळ मिळणार आहे.
दरम्यान, या योजनेला तत्वत: मान्यता देऊन गती दिल्याबद्दल मुख्यमंत्री देवेंद्र फडणवीस आणि जलसंपदा मंत्री गिरीष महाजन यांचे आभार मानण्यात आले आहेत. ही योजना पूर्णत्वास गेल्यास परिसरातील शेतीचा चेहरामोहरा बदलण्याची अपेक्षा व्यक्त केली जात आहे.
