[ग्रामस्थांकडून स्ट्रीट लाईट बसविण्याची मागणी ]
भुसावळ – तालुक्यातील फेकरी येथील संस्कृती नगर परिसरात मंगळवार,दि.२८ऑक्टोबर रोजी मध्यरात्रीच्या सुमारास दुहेरी घरफोडीच्या दोन घटना घडल्या असून,चोरट्यांनी सुमारे २५ हजार रुपयांचा ऐवज लंपास केल्याने परिसरात खळबळ उडाली आहे.
मिळालेल्या माहितीनुसार,संस्कृती नगर परिसरातील रहिवासी संदीप अशोक वाघ हे रात्री ड्युटीवर गेले असता अज्ञात चोरट्यांनी त्यांच्या घराचा दरवाज्याचा कोंडा तोडून आत प्रवेश केला.घरातील कपाटे उघडून सामानाची उधळण करून, २०,००० रुपयांची रोकड तसेच त्यांच्या आई उषाबाई वाघ यांच्या कपाटातील ५,००० रुपये अशी एकूण २५,००० रुपयांची रोकड चोरट्यांनी लंपास केली.दरम्यान,शेजारी राहणारे सोपान कोळी हे त्या रात्री गावाला गेल्याने त्यांच्या घरातील नुकसानीचे प्रमाण अद्याप स्पष्ट झालेले नाही.
घटनेची माहिती मिळताच तालुका पोलीस स्टेशनचे हवालदार मनोज उलकर यांनी घटनास्थळी भेट देऊन पाहणी केली.वरिष्ठ पोलीस निरीक्षक महेश गायकवाड यांच्या मार्गदर्शनाखाली पंचनामा करून पुढील तपास सुरू आहे.
या दुहेरी घरफोडीनंतर परिसरातील नागरिकांमध्ये भीतीचे वातावरण पसरले आहे. ग्रामस्थांनी सांगितले की,संस्कृती नगर परिसरात स्ट्रीट लाईट नसल्याने रात्री अंधाराचे साम्राज्य असते,त्याचा फायदा चोरट्यांनी घेतला आहे.तसेच परिसरात वाढलेल्या गवत व झुडुपांमुळे चोरट्यांना लपण्यासाठी सोय होते,असेही नागरिकांचे म्हणणे आहे.त्यामुळे ग्रामस्थांनी ग्रामपंचायतीकडे तातडीने स्ट्रीट लाईट बसविण्याची आणि पोलीस गस्त वाढविण्याची मागणी केली आहे.
फेकरीसारख्या शांत गावात अल्पावधीतच झालेल्या दुहेरी घरफोडीच्या घटनेमुळे नागरिकांमध्ये चिंता वाढली असून, ही घटना पोलीस प्रशासनासाठीही एक गंभीर इशारा ठरली आहे. पोलीसांनी चोरट्यांचा शोध घेण्यासाठी तपासाचे चक्र वेगाने फिरविले आहे.
