भुसावळ – शहरातील जामनेर रोडवरील शेठ घासीलाल अँड सन्स या दुकानासमोर उभी असलेली रिक्षा अचानक पेट घेतल्याची घटना घडली. या आगीत रिक्षेचे मोठ्या प्रमाणात नुकसान झाले.
मिळालेल्या माहितीनुसार, एक ग्राहक दुकानात वडा घेण्यासाठी गेला असताना रिक्षा चालकाने भट्टीजवळच रिक्षा सुरू अवस्थेत ठेवली होती. यावेळी गॅसच्या ज्वाळेमुळे अचानक रिक्षेला आग लागली. काही क्षणातच आगीने तीव्र रूप धारण केल्याने परिसरात एकच खळबळ उडाली.
एम.एच.१९ बी.डब्ल्यू.१२७९ क्रमांकाची ही रिक्षा आलम रज्जाक शेख यांची असून या आगीत वाहनाचे मोठे नुकसान झाले आहे.
घटनेची माहिती मिळताच अग्निशमन दल घटनास्थळी दाखल झाले व त्यांनी तत्काळ आगीवर नियंत्रण मिळवले. सुदैवाने या घटनेत कोणतीही जीवितहानी झाली नाही.
दरम्यान, निष्काळजीपणामुळे ही घटना घडल्याची शक्यता व्यक्त केली जात असून अधिक तपास सुरू आहे.
