भरधाव टेम्पोची ट्रकला समोरासमोर धडक; 19 वर्षीय युवक ठार!

पोलीस वार्ता, सातारा : पुणे राष्ट्रीय महामार्गावर मध्यरात्री झालेल्या भीषण अपघातात एका 19 वर्षीय युवकाचा जागीच मृत्यू झाला असून इतर तिघेजण जखमी झाले आहेत. ही घटना मौजे हरीश्चंद्री, ता.भोर येथील श्रद्धा हॉटेलसमोर घडली आहे.

पोलिसांकडून मिळालेल्या माहितीनुसार, दि.20 फेब्रुवारी रोजी मध्यरात्री सुमारे 1:00 वाजेच्या सुमारास पुण्याकडून साताऱ्याकडे जाणारा टेम्पो क्रमांक MH12 JF 5364 च्या चालक अक्षय बापू सकटे, वय-29, रा- धनगरवाडी, ता.खंडाळा, जि.सातारा हा भरधाव वेगाने व निष्काळजीपणे वाहन चालवत असताना रस्त्यावरील मध्यभागी असलेला डिव्हाईडर ओलांडून विरुद्ध दिशेला गेला. त्यानंतर साताऱ्याकडून पुण्याकडे येणाऱ्या ट्रक क्रमांक MP09 AL 9308 याला समोरासमोर जोराची धडक दिली.

या अपघातात टेम्पोमधील श्रेयस बाळू साळवे, वय-19, रा- धावडवाडी, ता.खंडाळा, जि.सातारा यांचा गंभीर दुखापतीमुळे मृत्यू झाला आहे. तसेच फिर्यादी इकरार रमजान मोहमंद, वय- 18 मूळ रा- आलापुर, ता.जि.अमेठी, उत्तरप्रदेश, सध्या रा- भिवंडी बायपास, ठाणे व ट्रक चालक फरीद मोहमद यांना दुखापत झाली आहे. अपघातात दोन्ही वाहनांचेही मोठे नुकसान झाले आहे. या प्रकरणी राजगड पोलीस ठाण्यात मोटार वाहन कायदा कलम 184 अंतर्गत चालक अक्षय सकटे याच्याविरुद्ध गुन्हा दाखल करण्यात आला आहे.

घटनेचा पुढील तपास राजगड पोलीस स्टेशनचे पोलीस निरीक्षक राजेश गवळी यांच्या मार्गदर्शनात हवालदार नाना मदने करीत आहे.