विरार इमारत दुर्घटनेतील मृतांचा आकडा 17 वर, मुख्यमंत्र्यांकडून मृतांच्या वारसांना 5 लाखांची मदत जाहीर

फक्त 15 वर्षे जुनी 2012 मध्ये बनलेली इमारत कशी काय कोसळते? इमारतीत एकूण 50 फ्लॅट होते त्यातील जो भाग कोसळला त्यात 12 फ्लॅट होते..

पोलीस वार्ता, ठाणे : राज्यभरात गणेशोत्सवाचा उत्साह असताना पालघर जिल्ह्यातील विरार भागातील रमाबाई अपार्टमेंट ही चार मजली इमारत दुर्घटनाग्रस्त झाली, मंगळवारी दि.26 ऑगस्ट 2025 रोजी रात्री 12.05 वाजेच्या सुमारास इमारतीचा मागील भाग कोसळला. या घटनेने परिसरात खळबळ उडाली. फक्त 15 वर्षे जुनी 2012 मध्ये बनलेली इमारत कशी काय कोसळते हा सगळ्यांना प्रश्न पडला आहे. इमारतीत एकूण 50 फ्लॅट होते त्यातील जो भाग कोसळला त्यात 12 फ्लॅट होते.

बचाव कार्य चालू असून बुधवारी ढिगाऱ्याखालून 20 ते 25 जण अडकल्याची शक्यता व्यक्त करण्यात आली होती. इमारत अरुंद गल्लीत असल्याने येथे रेस्क्यू ऑपरेशनसाठी गाडी आणि रुग्णवाहिका आत पोहोचने अवघड झाले आहे. त्यामुळे एनडीआरएफच्या टीमला मॅन्यूअली रेस्क्यू ऑपरेशन करावं लागत असून कामात बराच वेळ लागतो आहे.

नुकत्याच मिळालेल्या माहितीनुसार, आतापर्यंत 17 जणांचा मृत्यू झालेला आहे, याबद्दल मुख्यमंत्री देवेंद्र फडणवीस यांनी तीव्र दुःख व्यक्त केले आहे आणि मृतांना भावपूर्ण श्रद्धांजली अर्पण केली आहे. या सर्व कुटुंबियांच्या दुःखात आम्ही सहभागी आहोत, शासनाकडून मृतांच्या वारसांना 5 लाख रुपयांची मदत मुख्यमंत्री देवेंद्र फडणवीस यांनी जाहीर केली आहे. गेल्या 48 तासांपासून सतत एनडीआरएफ टीमच्या मदतीने हे बचाव कार्य असून पुढचे काही तास ते चालू राहील. आतापर्यंत 9 जणांना सुरक्षित वाचविण्यात यश आले आहे.

स्थानिकांच्या सांगण्यानुसार वसई विरार महानगरपालिकेने (VVMC) तक्रार दाखल केल्यानंतर विरार ठाणे पोलीसांनी बांधकाम व्यावसायिक नितल गोपीनाथ साने आणि या अपघातासाठी जबाबदार असलेल्या जमीन मालकाविरुद्ध महाराष्ट्र प्रादेशिक नगररचना कायद्याच्या कलम 52, 53 आणि 54 आणि भारतीय दंड संहितेच्या कलम 105 अंतर्गत गुन्हा दाखल केला असून पोलिसांनी बिल्डरला अटक केली आहे. आतापर्यंत बाहेर काढलेले आणि ओळख पटवलेल्या मृतांची नावे 1)आरोही ओंकार जोविल (24), त्यांची एक वर्षाची मुलगी 2) उत्कर्षा जोविल, 3) लक्ष्मण किस्कू सिंग (26), 4) दिनेश प्रकाश सपकाळ (43), 5) सुप्रिया नेवाळकर (38), 6) अर्णब निवलकर (11) आणि 7) पार्वती सपकाळ(60) 8) दीपेश सोनी ( 41), 9) सचिन नेवाळकर (40), 10) हरीश सिंग बिष्ट (34), 11) सोनाली तेजाम (41), 12) कशिश पवन सहेनी (35), 13) शुभांगी पवन सहेनी (40), 14) गोविंद सिंग रावत (28), 15) दीपक सिंग बोहरा (२५) अशी आहेत.

✍️पोलीस वार्ता प्रतिनिधी: दिनेश पाटील, ठाणे, संपर्क: 8097983334