मनपा आयुक्त श्रीमती मनिषा खत्री यांना जेलरोड प्रभागातील मनपा सुविधा पुरवण्याची विनंती..

नागरिक तक्रार करून देखील नाशिकरोड विभागीय महापालिका अधिकारी कामे करत नाहीत किंवा तसे संबंधित विभागांना तसे आदेश देत नाही..

पोलीस वार्ता, नाशिक : सध्या शहरात महानगरपालिकेवर प्रशासक सत्ता असून लोकप्रतिनिधी म्हणजे नगरसेवक पदे रिक्त आहेत, त्यामुळे नागरिकांचे प्रश्न हे दिवसेंदिवस वाढत चालले असून वेळोवेळी तक्रार करून देखील महापालिका ते सोडवण्यास असक्षम दिसत आहे.

पावसाळ्यात देखील जेलरोड, नाशिकरोड भागात कमी दाबाने पाणी येण्याची समस्या, रस्त्यांमध्ये पडलेले मोठमोठे खड्डे, ड्रेनेच्या समस्या, रस्त्यांचे बंद पडलेले पथदिवे, आरोग्याच्या समस्या औषध फवारणी, सार्वजनिक स्वच्छतागृहांचीरस्त्याभोवती वाढलेले गवत व झाडी-झुडपे, अनाधिकृत बांधकामे आणि बाजारातील रस्त्यांवरचे अतिक्रमण हे व इतर अनेक प्रश्न नागरिकांसमोर असताना तक्रार करून देखील नाशिकरोड विभागीय महापालिका अधिकारी कामे करत नाहीत किंवा तसे संबंधित विभागांना आदेश देत नाही.

नाशिकरोड भागातील प्रभाग क्र-18 मध्ये पंचक येथील प्राथमिक आरोग्य केंद्रात असलेले महिला प्रसूती विभाग हे गेल्या काही वर्षांपासून बंद आहे. त्यामुळे सर्वसामान्य गोरगरीब नागरिकांची गैरसोय होत आहे. वेळोवेळी मागणी करून देखील नाशिकरोड मनपा अधिकारी यावर लक्ष देत नाही. प्रभागातील बहुतेक रस्ते खड्ड्यांनी व्यापले असून त्यात पडून नागरिक किरकोळ जखमी होत आहे. शनी मंदिर ते राजराजेश्वरी कार्यालय रस्त्यावर अनाधिकृत भाजीपाला मार्केट बसत असून तेथून रोज वाहतुकीची समस्या निर्माण होत आहे. मनपाने त्यांना पर्यायी जागा द्यावी. पंचक गावातील सार्वजनिक शौचालयात नियमित सफाई केले जात नाही. तसेच तिथे लाईटची सोय नाही. प्रभागात होणाऱ्या कमी दाबाच्या पाणी पुरवठ्यामुळे नागरिक त्रस्त आहे. मनपा शाळेची संरक्षण भिंत पडली असून शाळा व विद्यार्थी यांच्या सुरक्षेचा प्रश्न उभा राहिला आहे.

त्यातच नव्याने पंचक गाव परिसरातील गोदावरी नदी काठच्या सांडपाणी शुद्धीकरण प्रकल्पाच्या (एसटीपी) वाढीव कामांसाठी अवजड मोठ्या वाहनांच्या वाहतुकीमुळे रहदारीच्या लहान गावकरी रस्त्यावर नागरिकांना नाहक त्रास सहन करावा लागत आहे. रस्त्याच्या दोन्ही बाजूंनी झाडी-झुडपे वाढली असून त्यात रस्त्याचे खड्डे यामुळे नागरिकांना या रस्त्यांवर ये-जा करणे कठीण झाले आहे. याच संदर्भात प्रभाग क्र.18 मधील सर्व समस्यांवर नाशिक मनपा आयुक्त श्रीमती. मनिषा खत्री यांनी त्वरित लक्ष देऊन त्यांचे निराकरण करावे यासाठी त्यांना दि.25 सप्टेंबर 2025 रोजी पंचक रहिवाशांकडून निवेदन देऊन विनंती करण्यात आली.

यावेळी पंचक येथील मा.नगरसेवक व सभापती ॲड.सुनील(आण्णा) बोराडे, वि.का.सोसा. ज्येष्ठ संचालक शंकरराव बोराडे, रा.काँ युवक शहर सरचिटणीस गणेश मोरे, वि.का.सो. संचालक कैलास बोराडे, प्रवीण बोराडे, नितीन बोराडे, गोरख बोराडे, योगेश मुळाने, कल्पेश(बबलू) बोराडे, प्रसाद बोराडे, भाऊसाहेब बोराडे, नरहरी कसबे आदी ग्रामस्थ व जेष्ठ नागरिक उपस्थित होते.