महापालिका निवडणूक चारचा प्रभाग, ईव्हीएमवर प्रत्येक उमेदवाराच्या प्रवर्गानुसार वेगळ्या रंगांची मतपत्रिका..

प्रभाग 20 आणि 22 मध्ये दोन इव्हीएम बॅलेटवर दोन-दोन असे चार मतदान करावे लागणार, तर प्रभाग 21 मधील उमेदवारांची संख्या जास्त असून चार स्वतंत्र इव्हीएम बॅलेट मशीन असणार..

पोलीस वार्ता, नाशिक : महानगरपालिका निवडणूक 2025-26 हे प्रभाग रचना पद्धतीत होणार असून एका प्रभागात अ, ब, क आणि ड अशा चार जागांच्या प्रवर्गाचा समावेश आहे. मतदान EVM/ईव्हीएम मशीनवर प्रत्येक प्रवर्गासाठी वेगळ्या रंगीत मतपत्रिकांचा वापर केला आहे. अ-प्रवर्ग पांढरी, ब-प्रवर्ग फिकट गुलाबी, क-प्रवर्ग पिवळी, आणि ड-प्रवर्ग निळ्या रंगाची मतपत्रिका दिसेल, बुधवार दि.7 जानेवारी ला नाशिक महापालिकेच्या नाशिकरोड भागातील प्रभाग 20, 21, 22 साठीच्या ईव्हीएमचे प्रात्यक्षिक दाखविण्यात आले आहे.

प्रभागात मतदान EVM यंत्रावर कशा प्रकारे मतपत्रिका लावण्यात येईल याबाबतची माहिती महापालिका निवडणुकीच्या मतदान प्रक्रियेची पूर्वतयारी दरम्यान प्रशासनाकडून उमेदवार व त्यांच्या प्रतिनिधींना दिली जात आहे. मतदारांमध्ये मतदान करताना संभ्रम निर्माण होऊ नये यासाठी ईव्हीएमवर प्रत्येक प्रभागातील प्रवर्गांसाठी वेगवेगळ्या रंगाची मतपत्रिका लावण्यात येणार असल्याचे यावेळी निवडणूक अधिकाऱ्यांनी सांगितले आहे.

महापालिका निवडणुकीत उमेदवारांची संख्या मोठी आहे. नाशिक शहरात चारचा प्रभाग आहे. एका इव्हीएम बॅलेट मशीनवर 14 उमेदवारांची नावे असतात. नोटा पर्यायासाठी एक बटण राखीव असते. उमेदवारांची संख्या जास्त असेल तर जास्तीत जास्त चार इव्हीएम बॅलेट मशीन वापरले जातात, प्रभाग 20 आणि 22 मध्ये दोन इव्हीएम बॅलेटवर दोन-दोन असे चार मतदान करावे लागणार आहे. तर प्रभाग 21 मधील उमेदवारांची संख्या 37 असून या प्रभागासाठी चार स्वतंत्र इव्हीएम बॅलेट मशीन वापरले जाणार आहे.

मतदारांना चार वेळा मतदान करता येणार आहे. एका रंगातील उमेदवारांसाठी एकदाच बटन दाबावे लागणार, एकाही उमेदवाराला मत द्यायचे नसेल तर त्यात्या रंगाच्या मतपत्रिकेत नोटाचा पर्याय आहे.